Mo ye ti wara anzoni kamarade?

MINGI ti azo aye ti wara anzoni kamarade wala ndeko. Ti fa na akota kamarade ti mo peko ti aye so asi na mo ayeke sara si gigi ti mo anzere mingi. Me tongana nyen si mo lingbi ti wara atâ kamarade? A ga nduru ti sara ngu 2 000 awe, Jésus afa so tâ kota ye ti sara si songo kue na popo ti azo atambela nzoni ayeke ndoye so kion ayeke dä pëpe. Lo tene: “Ye so i ye azo asara na i, i sara tongaso na ala nga.” (Luc 6:31). Tënë ni afa so, ti tene mo wara akamarade, a yeke nzoni mo duti zo ti kion pëpe. Na nduru tënë, ti wara kamarade, a yeke nzoni mo kue mo duti kamarade ti azo. Mo yeke duti ni tongana nyen?

Zo ayeke lë mbeni kpengba songo ti kamarade na mba ti lo gi hio tongaso pëpe. Ti bâ ni nzoni, akamarade ti mo ayeke gi pëpe azo so mo hinga ala. Ala yeke azo so mo mû bê ti mo na ala. Ti lë songo ti kamarade na ti ngbâ ti bata ni a hunda ti sara ngangu. Songo ti kamarade ahunda ti tene mo zia bezoin ti zo ni kozo na ye so anzere na mo. Na yâ ti songo ti kamarade, mo yeke kangbi ngia nga na vundu legeoko na zo ni.

Mo yeke fa so mo yeke tâ kamarade ti zo ni mbilimbili na dengo bê ti lo nga na sarango mbeni ye ti mû maboko na lo. Mbeti ti aProverbe 17:17 atene: “Tâ ndeko andoye lakue; na lâ ti ye ti vundu, lo yeke tongana tâ ita.” Biani, songo ti kamarade alingbi même ti duti ngangu mingi ahon songo ti fami. A-Proverbe 18:24 atene: “Mbeni ndeko ayeke so aduti nduru na mo ahon ita ti mo.” Mo ye ti hinga ambeni ye na ndo tongana nyen ti lë mara ti songo ti tâ kamarade tongaso? Mo ye ti ga na popo ti azo so a hinga ala na ndoye so ala yeke na ni na popo ti ala? (Jean 13:35). Tongana mo yeda, a yeke nzere ande mingi na aTémoin ti Jéhovah ti ndo so mo yeke dä ti fa na mo tongana nyen ti wara atâ kamarade.