Fango tënë na aChinois na Mexique
“FADE azo bale-oko ti yanga nde nde kue ti amara, ala gbu sakatumbo ti zo so ayeke Juif, ala tene, Fade e gue na mo, teti e mä so Nzapa ayeke na i.” (Zacharie 8:23). Laso, pendere prophétie so aga tâ tënë na ndo sese kue. Azo ti “yanga nde nde kue ti amara” agbu ngangu yanga ti bongo ti azo ti Israël ti yingo ti voro Jéhovah Nzapa. Tënë ti gango tâ tënë ti prophétie so agbu bê ti aTémoin ti Jéhovah ngangu. Ni la, mingi ti ala amanda ambeni yanga nde ti sala na kua ti fango tënë na ndo sese kue.
A-Témoin ti Jéhovah ti kodoro ti Mexique nga asala tongaso. Wungo ti aChinois na Mexique ayeke saki 30 tongaso. Na ngu 2003, ala 15 aga na Dango Bê na kuâ ti Christ so a sala ni na li-kodoro ni so ayeke Mexico. Ge la si aTémoin ti Jéhovah na Mexique ahinga so lege ayeke dä ti tene tënë ti Nzapa amaï na popo ti aChinois so aduti kâ. Ti wara awafango tënë mingi ti bâ lege ti aChinois so, a zia na sese mbeni kapa ti fango na aTémoin ti Jéhovah so ayeke aMexicain akode ti fango tënë so akpengba pëpe na mbeni yanga ti Chinois so ayeke Mandarin. Kapa so asala lani nze ota. Ala kue so awara fango ye ni ayeke lani 25. Na hunzingo ti mandango ye ni, mbeni kota zo ti ala so ayeke tene yanga ti Mandarin na gbata ti Mexico aga na matanga ti mungo kota-mbeti na azo ni. Gango ti lo afa so kapa ti mandango ye so andu aChinois ni ngangu. Mbeni ndo so ayeke sala kua na iri ti aChinois na gbata ni ahunda ti tokua ambeni wamandango ye ni ota na kodoro wande ti tene ala kiri amanda yanga ti Chinois ni pendere.
Na oko ngoi so lani ala yeke manda ye ni, ala yeke tara tele ti ala biani biani. Na peko ti so ala manda akozo kode ti tenengo yanga ti Chinois ni, hio awamandango ye ni ato nda ti fa tënë na ando ti dengo buze ti aChinois na gbata ti Mexico. Akpengba wakua so ato nda ti manda Mbeti ti Nzapa na azo 21. Brochure Ye Wa Nzapa Ahunda na E? ti yanga ti Chinois so a sû gere ti ambeti ni tongana ti Sango amû maboko mingi na ala.
A-Témoin ti Jéhovah so ato nda ti manda Chinois ni ade ti ninga pëpe ayeke manda Mbeti ti Nzapa na azo ni tongana nyen? Kozoni, tënë so ala hinga ayeke gi so: “Qing Du [Diko ni]” na ala fa mbeni paragraphe, na pekoni ala fa hundango tënë ni. Tongana zo ni adiko paragraphe ni si lo kiri tënë ni awe, ala tene “Shei shei [Singila]” nga “Hen Hao [Nzoni mingi].”
A to nda ti mara ti mandango ye so na mbeni wali so lo tene ni yeke Chrétien. Na peko ti ota mandango ye ni, Témoin ti Jéhovah ni ahunda tele ti lo wala wali ni amä yâ ti atënë ni nzoni. Tongaso Témoin ti Jéhovah ni amû mbeni ita-koli so ayeke Chinois, na ala gue abâ wali ni. Tongana ita-koli ni ahunda wali ni ti bâ wala lo yeke na mbeni tënë ti hunda, wali ni atene: “Ti tene mbi wara batême, a yeke nzoni mbi hinga ti tï ngu si?”
Kete na pekoni, a zia na sese bungbi ti Mandango Buku ti Kongregation so aChinois 9 na aita ti Mexique 23 si ayeke ga dä. Na popo ti aChinois ni, mo yeke wara mbeni wanganga so mbeni zo ti kobela ti lo amû na lo Tour ti Ba Ndo na Réveillez-vous! na yanga ti Espagnol. Teti so lo hinga ti diko Espagnol pëpe, lo hunda lani na mbeni zo ti kiri peko ti ambeni tënë ni na lo. Tongana wanganga ni abâ so a yeke ambeti ti nzapa, lo hunda zo ti kobela ni ti bâ wala ni lingbi ti wara ambeti ni na yanga ti Chinois. Ita-wali ni aga na lo ambeti ni nga na lege ti biröo ti aTémoin ti Jéhovah ti Mexique, a leke ti tene mbeni Témoin so atene yanga ti Chinois ague abâ wanganga so. Na tango so wanganga so angbâ lani na Chine, mama ti lo ayeke na Bible, na wanganga so adiko ni mingi. Kozo si lo gue na Mexique, mama ti lo atene na lo ti ngbâ ti diko Bible ni lakue. Ni la, lo sambela ti wara mbeni zo so alingbi ti mû maboko na lo ti hinga ye mingi ahon ti kozo na ndo Nzapa so Bible asala tënë ti lo. Tele ti lo anzere mingi si lo tene: “Nzapa amä sambela ti mbi!”
Ambeni zo so ayeke ga na mandango buku ni ayeke mbeni sewa ti aChinois so ayeke loué da ti mbeni wali ti Mexique so aTémoin ti Jéhovah ayeke manda Bible na lo. Atâa so azo ti sewa so amä lani Espagnol nzoni pëpe, ala yeke ga na mandango Bible ni. Na pekoni, sewa so ahunda na Témoin ni wala lo yeke na mbeni mbeti ti nzapa na yanga ti Chinois. Kete na pekoni, a to nda ti sala étude na ala na yanga ti Chinois. A ninga pëpe, azo ti sewa so atene ala ye ti fa tënë na amba ti ala aChinois nga ti mû tele ti ala na Jéhovah.
Ti tâ tënë ni, yanga ti Chinois akpengba. Ye oko, na lege ti atapande so e fa ge, maboko so Jéhovah ayeke mû amû lege na azo mingi ti yanga nde nde na Mexique (so aChinois nga ayeke dä) ti manda ti hinga ye so Nzapa aye, legeoko na yâ ti ambeni kodoro wande.
[Foto na lembeti 17]
Ekole ti mandango yanga ti Chinois na gbata ti Mexico
[Foto na lembeti 18]
Mbeni Témoin ti Jéhovah ti Mexique ayeke manda Bible na mbeni zo na yanga ti Chinois
[Foto na lembeti 18]
Fango tënë da na da na yanga ti Chinois na gbata ti Mexico