“Ndoye ti i awu mingi”

AMBENI ye ti ngangu asi na Japon na ngu 2004. A yeke aye tongana akota pupu, angu so asuku si a mû ndo nga na sese so ayengi. Aye ti ngangu so agbian aye mingi na yâ fini ti gbâ ti azo. Na popo ti ala, a yeke wara ambeni Témoin ti Jéhovah (Zo-ti-fa-tene 9:11). Ye oko, aye ti ngangu so azi lege na aTémoin ti fa tâ ndoye ti aita na popo ti ala.​—1 Pierre 1:22.

Na tapande, na nze ti juillet, na peko ti mbeni ngu so apika mingi, mbeni bale na bê kodoro ti Japon asuku ahon ndo ni juska a sigigi na a buba ada ti aTémoin ti Jéhovah ahon 20. Na yâ mbeni Da ti Royaume, ngu alinda juska a gbu zo na yâ ti lo. Hio, aTémoin ti akongregation so ayeke ndulu na ni aga ti mû maboko. Azo mingi amû tele ti ala mveni ti sukula ada so potopoto asi yâ ni. Gi na yâ yenga use senge, a sukula na a leke Da ti Royaume ni nzoni.

Na pekoni, na lango 23 ti nze ti octobre, sese ayengi ngangu mingi na oko kodoro so. Azo 40 tongaso akui, na a lingbi azo ahon 100 000 azia da ti ala ti gue na mbeni ndo nde. Yengingo ti sese so asala si ngu na wâ ti dada ayeke dä pëpe. Atâa so tâ ndo so sese ni ayengi dä ngangu ayo mingi pëpe na Da ti Royaume so aleke pekoni fade, ye oko asala ni pëpe. Fade fade Da ti Royaume so aga mbeni ndo so azo ayeke bungbi tele ti ala dä ti mû maboko na azo so awara kpale. Hio a-ancien agi ti hinga ye so asi na aita ti ala, na bê ti ala adë ti mä so mbeni oko awara ye ti sioni pëpe. Ndade ni na kota ndapelele, aTémoin omene so ngu so apika lani na nze ti juillet abuba da ti ala amû tele ti ala kue ti gue na kobe na ngu na aita so alango na ndo so sese ni ayengi dä. Gi kete na yâ ti ngoi so sese ni ayengi, a wara lege ti kangbi ye na aita so awara kpale.

Mbeni ancien atene: “Ala so lani ngu asuku amû da ti ala abâ so, ti mû maboko na ala so yengingo ti sese asala ngangu na ndo ti ala, a yeke tongana mbeni kiringo singila teti maboko so ala mveni awara ni lani tongana ngu asuku. Aita ni so asala kua ngangu ato nda ni na kota ndapelele juska na bê ti bï. Ala yeke na ngia mingi ti sala ni!”

Atâa ngu asuku amû ndo kue wala sese ayengi, a lingbi pëpe ti buba yengo tele so ayeke na popo ti aita Témoin ti Jéhovah. Nde na so, tongana mara ti aye ti ngangu tongaso asi, aChrétien ayeke bâ gango tâ tënë ti atënë ti bazengele Paul so na aita ti Thessalonique: “Ndoye ti i awu mingi na ambeni zo na popo ti i.”​—2 aThessalonicien 1:3.