Ala fa nzo tënë na azo so mê ti ala akanga

“ALA mû na i ngangu na lege ti yingo!” So ayeke tënë ti wayinda ti mbeni da so a yeke bata ambakoro dä. A yeke na Navalcarnero, na Madrid, gbata ti Espagne. Lo sala tënë so na ndo ti aTémoin ti Jéhovah so aga ti bâ ambakoro ni. Nyen la apusu lo ti tene tënë so?

Mingi ti ambakoro ti da ti Rosas del Camino ayeke azo so mê ti ala akanga. Me teti so aTémoin ti Jéhovah amanda yanga ti kodoro ti awambongi ti Espagne, ala lingbi ti sala lisoro na ambakoro so. Wayinda ni agonda aTémoin ni ndali ti so ala mû ngoi ti ala senge senge ti fa tënë ti Nzapa na azo so ayeke na bezoin ni. Lo bâ tongana nyen nzo tënë ti Royaume ni asala nzoni na ndo ti ambakoro ni. Na ambakoro ni nga kue, mbilimbili ala so ayeke mä ndo nzoni pëpe wala ala so ayeke bâ ndo nzoni pëpe, ala yekia mingi gango so aTémoin ni aga ti bâ ala so.

Eulogio ayeke mbeni oko ti ala. Lê ti lo abuba, na lo yeke mä ndo mbeni pëpe. Lo yeke manda fadeso Bible na aTémoin ti Jéhovah. Mbeni lâ, tongana lo yeke manda Bible, mbeni mbakoro-koli aga ndulu na tele ti ala. Lo mû na Témoin ni mbeni mbeti so azo ti da ni si asû ni. Mbeti ni ayeke ti fa singila ti bê ti ala ndali ti ye so aTémoin ti Jéhovah ayeke sala. Kota li ti mbeti ni ayeke “Ti duti mbeni Témoin.” Mbeni tënë ti yâ ni atene: “Gigi ti ala ayeke nzoni, na Jéhovah amû na ala ndara so asala si ala duti na ngia. Ala yeke gue lakue ti bâ azo na yanga-da ti ala ngbanga ti so ala zia bê ti ala kue na Jéhovah.”

Tâ gi ziango bê na Jéhovah so la si apusu mingi ti aTémoin ti manda yanga ti awambongi ti kodoro ti ala. A sala si ala fa tënë ti beku so ayeke na yâ Bible na azo.