“Mbeni oko ti alango so mbi yeke girisa ni pëpe”
MBENI ndokua ti letäa na kodoro ti Australie so abâ tënë na ndo ti kobela ti li atene: “Na popo ti akobela ti li so asala amaseka laso mingi, tâ kota kpale ni ayeke peut-être ti bê so anze mingi.” A bâ so ngu oko oko, a yeke amaseka 100 000 tongaso ti kodoro ni si ayeke na mara ti kpale so.
Ye so ayeke si ka na amaseka Chrétien nga. Me mabe so ala yeke na ni na Jéhovah amû maboko na mingi ti ala ti hon ndo ti bê so anze, na ti sala si ala bâ nzoni na lâ ti maseka ti ala. Na salango tongaso, bê ti ambeni zo apika na bango ala. Nyen la afa ni?
Bâ tapande ti Claire. Lo yeke na ngu 18. Lo na mama ti lo ayeke ti mbeni kongregation ti aTémoin ti Jéhovah na Melbourne, mbeni gbata ti Australie. Tongana babâ ti Claire adö sewa ni a zia, vundu ahon ndo ti lo. Me mabe so lo yeke na ni na Jéhovah, Babâ ti lo ti yayu, angbâ ngangu. Mbeni lâ, Lydie, so ayeke docteur ti sewa ni, aga ti bâ mama ti Claire so tele ti lo aso. Na pekoni, lo hunda na Claire ti gue ti zia lo na mbeni magazin ti vo ye. Na lege, lo hunda na Claire wala lo yeke na mbeni kete ndeko. Claire atene na lo so ni yeke Témoin ti Jéhovah, na ni yeke sigigi na koli pëpe. Bê ti docteur ni adö na mango tënë so. Na pekoni, Claire afa na lo tongana nyen Bible amû maboko na lo ti mû anzoni desizion na yâ fini ti lo. Na nda ni, lo hunda na docteur ni wala lo ye si ni ga na lo mbeti so amû maboko na ni mingi. A yeke mbeti Les jeunes s’interrogent — Réponses pratiques.
Claire ague na lo mbeti ni. Lango ota na pekoni, Lydie apika singa na mama ti Claire ti fa na lo tongana nyen si mbeti ni anzere na lo mingi. Lo hunda ti tene a gue na lo ambeti so omene ndali ti amba ti lo docteur. Tongana Claire aga na ambeti ni, docteur ni atene na lo so mabe ti lo Claire ni apika bê ti lo ngangu. Claire ahunda na lo wala lo ye ti manda Bible. Lo yeda.
Teti anze mingi, Claire amanda Bible na docteur ni na ngoi so azo ti kua ni ahu tele ti ala kete. Mbeni lâ, Lydie ahunda na Claire ti sala tënë na ngoi ti mbeni bungbi na ndo tënë ti amaseka so bê ti ala anze. Mbito asala Claire, me lo yeda na ni. Azo ahon 60 aga na bungbi ni. Kozoni, adocteur osio, so abâ tënë na ndo kobela ti li, amû tënë. Na pekoni, a mû tënë na Claire. Lo fa so a yeke kota ye ti tene amaseka aduti na nzoni songo na Nzapa. Lo tene so Jéhovah Nzapa ayeke bi bê ti lo mingi na ndo amaseka, na lo yeke mû maboko na ala kue so ague na mbage ti lo ti wara dengo bê. Lo fa nga mabe ti lo na Jéhovah so fade Lo yeke zi ande akobela kue, atâa ti mitele wala ti li (Esaïe 33:24). Ye ti nzoni wa lo wara na pekoni?
Claire atene: “Mingi ti azo aga na mbi, ala fa tongana nyen bê ti ala apika ti mä mbeni maseka asala tënë ti Nzapa. Mbi zia na azo ni buku Les jeunes s’interrogent 23. Amaseka-wali ota amû na mbi numéro ti téléphone ti ala. Mbi yeke manda Bible fadeso na mbeni oko ti ala. Biani a yeke mbeni oko ti alango so mbi yeke girisa ni pëpe.”