A wara iri ti Nzapa na yâ ngbele Bible ti yanga ti Zamani
IRI TI Nzapa ayeke Jéhovah. A yeke wara ni fani 7 000 tongaso na yâ ti Bible Les Saintes Écritures — Traduction du monde nouveau ti yanga ti Zamani, so a sigigi na ngu 1971.a Me kozo Bible ti yanga ti Zamani so iri ti Nzapa ayeke na yâ ni ayeke Bible so pëpe. Ambeni zo abâ so kozo Bible ti yanga ti Zamani so a wara iri Jéhovah dä, a yeke ti so Johann Eck asigigi na ni a sala ngu 500 awe. Johann Eck ayeke lani mbeni kota wandara ti Église Catholique.
A dü Johann Eck na ngu 1486 na mbongo ti Zamani. Na ngoi so lo wara ngu 24, lo ga kota wafango ye na ndo tënë ti Nzapa na kota da-mbeti ti Ingolstadt. Lo sala kua so juska na kuâ ti lo na ngu 1543. Lo duti na fini ngoi oko na Martin Luther, nga na mbeni ngoi lo na Martin Luther ayeke akamarade. Me na pekoni, Luther aga oko ti azo so amû li ni na yâ Kota Gbiango ye so asala si Église Protestant abâ gigi. Eck angbâ ti lo ti mû mbage ti Église Catholique.
Kota zo ti gbata ti Bavière ahunda na Eck ti kiri peko ti Bible na yanga ti Zamani. Mbeni kota bakari (Kirchliches Handlexikon) atene so lo kiri peko ti atënë ni na lege ni tongana ti so a sû na ni kozo. Bible so lo kiri pekoni asigigi na ngu 1537. Kota bakari so akiri atene so Bible ni alingbi na gonda ahon ti so azo agonda ni lani. Na yâ ni, Eck akiri peko ti Exode 6:3 tongaso: “Mbi yeke Seigneur. Mbi si na Abraam, Isaac na Jacob tongana Nzapa Ti Ngangu Ahon Kue: me iri ti mbi ti Adonaï, mbi fa ni na ala pëpe.” Na yanga ti lembeti ti Bible ni na mbage ti gati, Eck azia kete tënë so na ndo versê ni: “Iri ni ayeke Adonaï Jehoua.” Mingi ti awandara ti Bible abâ so a yeke ti kozoni ti tene iri ti Nzapa asigigi na yâ ti Bible ti yanga ti Zamani la.
Ye oko, a sala ngu saki mingi awe so azo ahinga iri ti Nzapa na ala di ni. Ti kozoni so a sû iri ni so na mbeti na yanga ti Hébreu, a zia “Jéhovah” (NW ) tongana iri ti oko tâ Nzapa (Deutéronome 6:4). Jésus atënë so ni fa iri ti Nzapa na azo. A sû tënë ti lo so na mbeti na yanga ti Grec a sala ngu 2 000 tongaso awe (Jean 17:6). Ti londo na ngoi ni so ngbii ti si laso, mo yeke wara iri so na yâ ti ayanga ti kodoro mingi. Na yâ ti kete ngoi, Psaume 83:19 ayeke ga tâ tënë. Azo kue ayeke hinga ande atene lo so iri ti lo ayeke Jéhovah, lo yeke Lo Ti Nduzu Ahon Kue na ndo sese kue.—Genèse 22:14.
[Kete tënë na gbe ni]
a A-Témoin ti Jéhovah si asigigi na ni kozo na Anglais na ngu 1961. Laso, mo yeke wara ni na ayanga ti kodoro 50, so na yâ ti ambeni, ambeti kue ti Bible ayeke dä nga ti ambeni gi ambage ni si ayeke dä.
[Foto na lembeti 32]
Bible ti Eck ti ngu 1558, na tënë so lo zia ndali ti iri Jéhovah na Exode 6:3