Mbeni yongoro tambela so aga na ye ti nzoni
MBENI tondo so e wara na mbage ti République Démocratique ti Congo afa tënë ti ambeni wali use yaya na ngambe so amû desizion ti sala mbeni yongoro tambela na yâ mbeni ndo so bira ayeke dä ti gue na mbeni kota bungbi ti aTémoin ti Jéhovah so a yeke sala ni na Lisala. A yeke lani Kota Bungbi ti District “Mû gloire na Nzapa”. Biani, ala ye ti gue na kota bungbi so ti mä tënë na ti duti na aita ti ala Chrétien. Me a yeke gi so pëpe: ala ye nga ti tingbi na aita so ayeke ga na iri ti filiale ti aTémoin ti Jéhovah ti Kinshasa. Ndali ti so bira ayeke na kodoro ni, teti angu mingi ala wara lani lege pëpe ti tingbi na mbeni ita oko tongaso ti filiale ni. Me fadeso, ala bâ so kota bungbi ni ayeke mû lege na ala ti bâ aita so.
Aita ti wali use so asala voyage na ngö, a londo na Basankusu so ala yeke dä ti gue juska na Lisala. Ye so ahunda na ala ti hon akilomètre 300 na popo ti agbako nga na abale use. Tambela ti ala ni aninga yenga ota. Ala use kue ayeke lani apionnier; mbeni oko ato nda ti kusala ni a sala ngu 3 na mbeni oko a sala ngu 19. Tongaso, ala mû ngoi so ala yeke gue na tambela ni ti fa tënë na azo na ndo Royaume. Ala fa tënë lani angbonga 110 na lege ti guengo ni, na ala zia atract 200 nga na apériodique 30.
Na ngoi so ala yeke hon na lê ti ngu, a hunda ti tene ala hon na popo ti akonô na angunde so asi singo na ndo ni so. Me a si na bï, ala yeke luti na mbeni ndo teti lege ayeke dä pëpe ti tene zo ahon na lê ti ngu na bï. Ala hon nga na gbâ ti aplace so a zia aturugu dä ti bâ wala mbeti ti azo kue so ahon ayeke na lege ni.
Tambela ti ala so aninga mingi na ala nze kete na pekoni; ye oko, ala yeke na ngia mingi na ye so ala sala. Ala use kue awara ngia mingi so ala ga na kota bungbi so a sala na Lisala so. Ala wara ngia mingi na yâ ti bê ti ala ndali ti tâ tënë, na tele ti ala anzere ti duti na popo ti aita 7000 so aga lani na kota bungbi ni. Na peko ti kota bungbi so, ala tï na lege ti kiringo ni na a-oko kpale so ayeke ku ala, me na nda ni, ala si na ndo ti ala na ala wara asewa ti ala kue.