Gingo siriri ti bê

ALBERT ayeke lani mbeni koli so ayeke na ngia na wali ti lo nga na amolenge ti lo use. Me lo bâ so mbeni ye amanke na yâ fini ti lo. Na mbeni ngoi so lani lo pika li ti lo ti gi kua, lo lï na yâ ti poroso na lo yeda na abibe ti aSocialiste na aCommuniste. Lo ga lani même mbeni ngangu zo na yâ kama poroso ti aCommuniste ti ndo so lo lango dä.

Ye oko, a ninga pëpe, bê ti Albert aso na tënë ti aCommuniste. Lo kaï songo ti lo na poroso na lo mû tele ti lo kue teti sewa ti lo. Oko ye so lo yeke gi fadeso ayeke tâ ngia ti sewa ti lo. Me, Albert angbâ ti bâ so mbeni ye amanke lo ngangu; lo hinga pëpe lege ti wara tâ siriri ti bê.

Ye so asi na Albert so asi gi na lo oko pëpe. Ti tene ala wara mbeni fini so nda ni ayeke dä, azo kutu mingi abi tele ti ala na yâ abango ndo, asenda-ndara na avorongo nzapa nde nde. Na mbage ti Do, na ngu 1960, a bâ lani sigingo ti mbeni bungbi ti amaseka so alondo ti ke anzoni ngobo ti salango ye nga na ti dutingo ti azo na yâ ti kodoro. Amaseka so ayeke gi lani tâ ngia nga ti hinga lege ti tene zo awara nzoni duti na lege ti nyongo ambangi nga na afango ye ti azo so amû li ni nga na ti akota prêtre ti bungbi ni. Ye oko, bungbi ti amaseka so awara pëpe lege ti si na tâ ngia. Nde na so, bungbi ni asala si nyongo mbangi na yengo aye ti pitan atï na popo ti amaseka, na tongaso a gue na azo na loro ti tï na yâ atambela ti kirikiri.

Teti angu ngbangbo mingi, azo mingi agi siriri na lege ti mosoro, ngangu ti komande wala mandango mbeti mingi. Aye so ague na nzengo bê na nda ni. Jésus atene: “Fini ti zo ayeke pëpe na ye mingi mingi so ayeke na lo.” (Luc 12:15). Nde na so, mingi ni lekengo na bê ti gi amosoro ayeke ga na vundu. Ni la, Bible atene: “Ala so aye ti wara mosoro, ala tï na yâ ye ti handa, na son, na nzara nde nde ti buba ye na ti ye so amû vundu, ye so abi ala na yâ ye so afuti ala, na [a gue na ala na futingo, NW ]. Gere ti sioye kue ayeke ti ndoye nginza; na lege ti gingo nginza, ambeni zo . . . [a]kpo tele ti ala mveni na ye ti vundu nde nde.”​—1 Timothée 6:9, 10.

Tongaso, tongana nyen mbeni zo alingbi ti wara siriri ti bê nga na mbeni ye ti sala na yâ fini ti lo? A yeke gi tënë ti tarango ndo, tongana ti tara ti pika kokora na bï na ndo mbeni ye so ayeke kpe kpengo? Nzoni ye ni ayeke so a yeke tënë ni la pëpe. Tongana ti so e yeke bâ ande na yâ article ti peko, lege ti wara siriri ni ayeke ti kaï mbeni kota nzara, so biani gi azo si ayeke na ni.

[Foto na lembeti 3]

Fade gingo mosoro, ngangu ti komande wala mandango mbeti mingi amû maboko na mo ti wara siriri ti bê?