Atënë so azo ahunda

Tongana ala mä so Pierre, so a kanga lo, ayeke na yanga ti da ni, ngbanga ti nyen adisciple atene: “A yeke ange ti lo”?​—Kusala 12:15.

Peut-être adisciple apensé, me na lege ni pëpe, so mbeni ange so aga na tokua ti Pierre si ayeke na yanga ti da ni. Zia e bâ atënë so angoro versê so.

Hérode, so afâ Jacques, amû yanga na azo ti zia maboko na ndo ti Pierre. Tongaso, adisciple ayeke na kpengba nda ti tënë ti tene na bê ti ala so Pierre nga ayeke kui tongaso. Na peko ti so a kanga lo na zingiri si a bi lo na da ti kanga, aturugu 16 so a kangbi yâ ti ala osio osio si abata Pierre na peko ti tele. Na pekoni, na mbeni bï, mbeni ange azi lo na asigigi na lo na da ti kanga ni na lege ti ye ti kpene. Na ngoi so Pierre ahinga biani atene ye so asi ayeke tâ ye, lo tene: “Fadeso mbi hinga biani, Seigneur ato ange ti Lo, Lo zi mbi na tïtî Hérode.”​—Kusala 12:1-11.

Hio na pekoni, Pierre ague na da ti Marie, mama ti Jean Marc, ndo so ambeni disciple abungbi dä. Tongana lo pika yanga ti gbagba ni, Rhode, mbeni maseka-wali so ayeke sala kua kâ, aga ti zi ni. Gi so lo hinga go ti Pierre, lo zi même yanga ti gbagba ni na lo pëpe, me lo kpe loro ti sala tënë ni na tanga ti azo ni. Kozoni, a yeke lani ngangu na adisciple ti yeda so Pierre si ayeke na yanga ti gbagba ni. Ni la, ala tene tënë so ayeke na lege ni pëpe: “A yeke ange ti lo.”​—Kusala 12:12-15.

Adisciple abâ ti ala atene a fâ Pierre awe na a yeke gi yingo ti lo si ayeke na yanga ti gbagba ni? A yeke tâ ngangu ti tene ala pensé tongaso, ndali ti so adisciple ahinga nzoni mingi tâ tënë ti Mbeti ti Nzapa na ndo ti akuâ, so atene ala ‘hinga ye oko pëpe’. (Zo-ti-fa-tene 9:5, 10). Tongaso, adisciple aye ti tene nyen tongana ala tene: “A yeke ange ti lo”?

Adisciple ahinga lani so, na yâ mbaï ti azo, a-ange amû maboko na azo ti Nzapa. Na tapande, Jacob asala tënë ti ‘ange so aton lo na yâ sioye kue’. (Genèse 48:16). Nga, na ndo mbeni kete molenge so ayeke lani na popo ti ala, Jésus atene na adisciple ti lo: “I bata nzoni, i ke mbeni oko ti akete molenge so pëpe; teti Mbi tene na i, a-ange ti ala na yayu ayeke bâ lê ti Babâ ti Mbi lakue, Lo so ayeke na yayu.”​—Matthieu 18:10.

A yeke nzoni ti bâ so mbeni Bible (Young’s Literal Translation of the Holy Bible) akiri peko ti tënë agʹge·los (wala “ange”) na “watokua”. A bâ so na popo ti aJuif, ambeni amä na bê so wakua ti Nzapa oko oko ayeke na mbeni ‘ange ti lo so ayeke bata lo’. Me ti tâ tënë ni, Mbeti ti Nzapa afa mara ti tënë so pëpe. Ye oko, tongana adisciple atene “A yeke ange ti lo”, peut-être ti ala a yeke mbeni ange so aga na iri ti Pierre si ayeke na yanga ti gbagba ni.