Mo yeke leke fini ti mo na ndo ti nyen?

MBENI da ayeke ninga gi tongana gere ni akpengba. Ngoi na ngoi Bible ayeke sala kusala na tënë so ti fa na mbeni ye.

Na tapande, prophète Esaïe asala tënë ti Jéhovah Nzapa tongana zo so ‘aleke gere ti sese.’ (Esaïe 51:13). Gere ti sese ni ayeke andia ti Nzapa so ayeke gbian pëpe na so ayeke fa lege na turnengo ti sese nga a sala si lo ngbâ na place ti lo (Psaume 104:5). Bible asala nga tënë ti “gere” ti ye so a leke dutingo ti bungbi ti azo ti sese na ndo ni (Tene ti Nzapa, Kozo Mbouki). Gere ni so ayeke aye tongana fango ngbanga ti mbilimbili, salango ye na lege ti ndia nga na salango ye na lege ni. Tongana “a fâ”, wala a buba, aye so na lege ti salango ye ti kirikiri, petengo goro nga na salango ye ti ngangu, nzoni duti ti azo nga ayeke buba.​—Psaume 11:2-6; aProverbe 29:4.

Kpengba-ndia so andu nga zo oko oko. Na hunzingo ti pendere Fango ye ti lo na ndo ti Hoto, Jésus atene: “Zo so amä tënë so Mbi tene, na lo bata, fade a bâ lo tongana zo ti ndara so asala da ti lo na ndo tênë; ngu apika, moa asi, na pupu aya na ayengi da so; me da ni atï pëpe, teti a leke gere ni na ndo tênë. Zo so amä tënë so Mbi tene, na lo bata pëpe, fade a bâ lo tongana zo ti buba so asala da ti lo na ndo mbutu; ngu apika, moa asi, na pupu aya na ayengi da so; na da ni atï na a futi kue.”​—Matthieu 7:24-27.

Mo yeke leke fini ti mo na ndo ti nyen? Mo yeke leke ni na ndo ti mbutu, so ti tene senda-ndara ti azo so ayeke nde na Nzapa, so na pekoni a yeke kungbi ande? Wala mo yeke leke ni na ndo ti mbeni kota tênë so akpengba, so ayeke salango ye alingbi na atënë ti Jésus Christ, so ayeke mû ande maboko na mo ti sigigi yamba na yâ ti aye so a haka ni na kota pupu?