A mû na azo ti Macédoine ye so amanke ala

‘GA NA Macédoine, mo mû maboko na e!’ (Kusala 16:9, Fini Mbuki, 2001). A yeke atënë so mbeni koli atene lani na Paul na yâ mbeni ye so akpa suma, na a fa so a lingbi a fa nzo tënë ti Royaume ti Nzapa na yâ ti mbeni fini kodoro, na yâ agbata so ayeke laso na Grèce.

Na kodoro ti Macédoine ti ngoi ti e, tongana a mû azo 1 840, a yeke wara gi Témoin ti Jéhovah oko. Azo mingi ade ti mä tënë na ndo Jéhovah Nzapa pëpe. Tâ tënë, azo ti Macédoine ayeke na yâ kota bezoin ti mä tokua ti siriri.​—Matthieu 24:14.

Nzapa azi lani lege si ala wara ye so ala yeke na bezoin ni. Mbeni lâ na novembre ti ngu 2003, biröo ti aTémoin ti Jéhovah na Skopje awara mbeni singa so ala ku tele ti ala na ni pëpe. Singa ni alondo na mbeni Bungbi na Macédoine so abâ tënë ti salango kusala maboko na maboko na akodoro wande, so atisa aita na gbe ti mbeni da so, na ndo table, ala lingbi ti fa ambeti so afa atënë ti mabe ti ala teti lango ota so ato nda ni na lango 20 ti novembre. A yeke lani biani mbeni kota lege so azi ti ndu azo mingi so ade ti mä nzo tënë ti Royaume pëpe!

Aita ti nzobe asala kua ngangu ti leke aye ti tene a zia na ndo ni ambeti nde nde ti aTémoin ti Jéhovah na yanga ti Macédonien. A zia ambeti nde nde na gigi ti tene azo so aga alingbi ti mû tongana ala yeda. Fango ambeti so amû lege na azo mingi ti wara ngu ti dê ti yingo senge senge.​—Apocalypse 22:17.

Azo so aga lani agi ambeti so andu fini ti ala, tongana Les jeunes s’interrogent​—Réponses pratiques na Lingu ti Tâ Ngia ti Sewa.a Azo 98 amû adresse ti ala ti tene aTémoin ti Jéhovah ague abâ ala. Azo mingi nga atene anzoni tënë na ndo nzoni kusala ti aTémoin ti Jéhovah nga na ndo pendere ti ambeti ni.

Mbeni koli aga lani na gbe ti da ni na kete molenge ti lo ti koli. Babâ ni ahunda wala mbeni buku teti amolenge ayeke dä. Aita afa na lo buku Mbeti ti atene ti Bible.b Lo zi yâ ni, na nzerengo tele lo hunda ngele ni. Tongana lo mä so a yeke sala kusala ti fango ye na azo na lege ti a-offrande so zo amû na bê ti lo, bê ti lo anzere mingi (Matthieu 10:8). Lo fa mbeti ni na molenge ni na lo tene na lo: “Bâ pendere mbeti so! Lango oko oko, fade mbi yeke diko na mo mbaï oko!”

Mbeni wafango mbeti na ndo senda-ndara aga lani na tele ti table ni. Lo ye tënë ti Nzapa mingi, me mbilimbili aye so aTémoin ti Jéhovah amä na bê dä. Tongana lo bi lê ti lo na yâ buku L’humanité à la recherche de Dieu,c lo tene: “A sala mbeti so tâ na lege ni biani! A yeke tâ na lege so si a sala na atënë ni tongana ti so mbi pensé fade.” Na pekoni, ambeni élève ti lo aga na ala hunda ti wara mara ti buku so wafango mbeti ni awara. Ala bâ ti ala atene lo yeke sala kua na buku ni na klase.

Fango ambeti so na gigi amû lege na ambeni zo ti mä ti kozoni tâ tënë ti Bible. Mbeni groupe ti amaseka so ayeke awambongi aga nga ti bâ ndo. Mbeni oko ti aTémoin asala mbeni ndulu lisoro na ala, so mbeni molenge ti wali akiri pekoni na ala. Na lege ti afoto ti buku Koli so ahon tanga ti azo kue,d lo fa na ala so Jésus azi kobela ti azo, nga lo sala si awambongi amä ndo. Tele ti ala anzere lani ti “mä” zendo ti Bible so na yâ ti kete ngoi fade Jésus ayeke sala mara ye so teti azo kue so aduti na ndo sese na ngoi ti e. Ambeni ayeda na ngia na ambeti so a mû na ala, na a leke ti tene mbeni Témoin so ahinga ti sala tënë na ala ague abâ ala.

Na tele ti yanga ti Macédonien, ambeti ayeke nga lani dä na yanga ti Albanais, Anglais na Turc. Mbeni koli so lo hinga ti tene Macédonien pëpe ahunda ti wara ambeti na Anglais. Na peko ti so lo wara a-Tour ti Ba Ndo na Réveillez-vous!, lo tene so ni yeke tene Turc. Tongana a fa na lo ambeti na yanga ti kodoro ti lo, li ti lo akpe kue! Lo bâ lani so aTémoin ti Jéhovah aye ti mû maboko na azo kue.

So pendere fango tënë na ngoi ni so, nga a yeke lani ye ti mungo ngangu biani ti bâ azo mingi so tâ tënë ti Bible anzere na ala! A yeke biani polele so Jéhovah azi lege ti tene azo mingi akiri amä nzo tënë ti Royaume na Macédoine.

[Kete tënë na gbe ni]

[Encadré/Afoto]

MBENI KPENGBA YE SO AFA GUENGO NA LI NI!

Na lango 17 ti mai 2003, mbeni kpengba ye asi so afa so nzo tënë ti Royaume ti Nzapa ague na li ni. A zi yanga ti biröo ti aTémoin ti Jéhovah na Skopje. Lekengo da ni aninga ngu use, na a kono yâ ti angbele da ni fani osio.

Akota da nde nde ota ayeke dä, so oko ayeke teti biröo so abâ lege ti kusala na kodoro ni, mbeni ayeke biröo ti awakiringo na peko ti ambeti nga mbeni so ayeke ndo ti lango, cuisine na ndo ti sukulango abongo. Guy Pierce, mbeni oko ti Wabatango Bungbi ti aTémoin ti Jéhovah, ayeke lani dä ti mû diskur ti mungo da ni na Jéhovah. Agene ti akodoro bale-oko aga nga na ngoi ti kapa ni. Bê ti azo kue lani asi na ngia ti bâ afini kota pendere da so.

[Carte na lembeti 8, 9]

(Ti bâ ni mbilimbili, bâ buku ni.)

BULGARIE

MACÉDOINE

Skopje

ALBANIE

GRÈCE

[Foto na lembeti 8]

Skopje, Macédoine