Nzo tambela ‘asepela tënë ti Nzapa’

MARIA, mbeni maseka-wali ti Kransnoyarsk, mbeni gbata na Russie, ayeke he bia pendere mingi. Ni la wafango mbeti ti lo azia lo na ekole ti hengo bia. Ngoi kete na pekoni, Maria ague na mbage ti mbeni oko ti awafango mbeti ti lo ti fa na lo so lo lingbi pëpe ti he ambeni bia ni. Ngbanga ti nyen? Ngbanga ti so hengo abia so andu tënë ti vorongo ague nde na atënë ti mabe ti lo so aluti na ndo Bible. Li ti wafango ye ni akpe kue si lo hunda: ‘Sioni ti nyen si ayeke na yâ hengo bia ti gonda na Nzapa?’

Ti fa nda ni so lo ke ti he abia so andu Tënë ti Nzapa ota na yâ tele oko, Maria azi Bible ti lo na lo fa so Nzapa na Jésus abungbi aga gi Nzapa oko pëpe, nga yingo vulu ayeke ngangu ti Nzapa ti sala na ye (Matthieu 26:39; Jean 14:28; Kusala 4:31). Maria afa peko ti ye so asi: “Ye ni abuba pëpe songo ti mbi na wafango ye ni. Ti bâ ni nzoni, e yeke na anzoni wafango ye na yâ ti ekole ti e. Ala ye si e duti na tâ salango ye ti e mveni.”

Na yâ ti ngu ti ekole ni kue, salango ye ti Maria so asala si wafango ye ti lo nga na akamarade ti lo ti klase ane lo. Maria atene: “Akpengba-ndia ti Bible amû maboko na mbi na yâ fini ti mbi. Na ngoi so ekole ni aga ti kanga, mbi wara lani mbeni palata ndali ti salango ye ti mbi mbilimbili nga na lege ni; nga ekole ti mbi atokua lettre ti singila na babâ na mama ti mbi ndali ti so ala fa lege na mbi nzoni.”

Maria awara batême na lango 18 ti août 2001. Lo tene: “Mbi yeke na ngia so mbi lingbi ti sala na mbeni nzoni Nzapa so ayeke Jéhovah!” Na ndo sese kue, amaseka so ayeke aTémoin ti Jéhovah ayeke bata atënë ti Tite 2:10, so atene: “Ga ye ti sepela nzo tënë ti Nzapa Sauveur ti e na yâ ye kue.”

[Foto na lembeti 32]

Maria na babâ na mama ti lo na peko ti batême ti lo

[Foto na lembeti 32]

Lettre ti gondango ndo nga palata ni