‘I lango pëpe’
GIRIRI, a yeke soro ambeni zo ti sala kusala ti batango yanga ti akodoro na ti atemple, nga na ambeni ngoi, a yeke soro ala ti bata yanga ti da ti lango ti azo. Na ndo ti so a lingbi ala bâ nzoni si yanga ti kodoro ni akanga na bï, azo ti batango yanga ti kodoro ni asala nga kusala tongana asinziri. A yeke biani mbeni kusala so afa na gigi so a zia bê kue na azo so a soro ala ti sala ni, ndali ti so fini ti azo ti kodoro ni kue ayeke na yâ ti maboko ti ala; na tongana mbeni ye ti sioni ayeke ndulu ti si, a yeke dekongo ti ala si ayeke fa tënë ni na azo ti yâ ti kodoro ni.
Jésus ahinga lani kusala ti awabatango yanga ti akodoro, so a hiri ala nga awabatango yanga ti da. Na mbeni ngoi, lo haka adisciple ti lo na mbeni wabatango yanga ti kodoro na lo wa ala ti lango pëpe teti lâ ti hunzingo ti aye ti ngoi ti aJuif ayeke ndulu. Lo tene: ‘Lê ti i akpengba! I lango pëpe, ngbanga ti i hinga ngoi ni pëpe. Ye ni ayeke duti ande tongana mbeni zo so ague na mbeni kodoro nde. Lo zia da ti lo kue na maboko ti azo ti kua ti lo. Lo mû yanga na wabatango yanga ti da ni ti tene lê ti lo akpengba, lo lango pëpe. Ayeke nzoni i lango pëpe, ngbanga ti so i hinga lango so wa ti da ni ayeke ga ande na ni pëpe.’—Marc 13:33-35, Fini Mbuki, 2001.
Legeoko nga, a sala laso ahon ngu 125 awe so mbeti-sango so, Tour ti Ba Ndo, ayeke fa tënë ti wango ti Jésus so: ‘I lango pëpe.’ Na lege wa? Tongana ti so a sala tënë ni na lembeti 2 ti mbeti-sango so atene: “Mbeti so ayeke bâ peko ti tambelango ti aye ti sese so asala si aprophétie ti Mbeti ti Nzapa aga tâ tënë. Lo dë bê ti amara kue na nzo tënë so, na yâ ngoi kete Royaume ti Nzapa ayeke lungula ala so ayeke sala ngangu na amba ti ala na pekoni lo yeke sala si sese aga paradis.” Na ndo lê sese kue wungo ti Tour ti Ba Ndo so a kangbi ni ahon 26 000 000 na ayanga ti kodoro 150. A kangbi Tour ti Ba Ndo na azo mingi na ndo sese so ahon ambeti-sango kue ti tënë ti Nzapa. Na lege ni, legeoko tongana ti so awabatango yanga ti kodoro ayeke sala giriri, na ndo kue aTémoin ti Jéhovah ayeke wa azo ti ‘lango pëpe’ na lege ti yingo ndali ti so Mveni ti da ni, Jésus Christ, ayeke ndulu ti si na ti fâ ngbanga na ndo aye ti sese ti laso.—Marc 13:26, 37.