“Ye nyen si mo sala?”

A YEKE tënë so mbeni mbakoro-koli so ayeke na yâ ti mbeni restaurant ahunda ni gi tongaso na Muriel, mbeni mama ti amolenge ota. Muriel ayeke lani na ye mingi ti sala ti gue na amolenge ti lo ti bâ adocteur nde nde, nga l’heure ahon awe. Ngoi ayeke na lo mingi pëpe ti kiri na kodoro ti te mbeni ye kozoni ti gue na bungbi. Tongaso, lo mû amolenge ni lo gue na ala na mbeni restaurant so ayeke ndulu ti tene ala te mbeni ye.

Tongana ala yeke hunzi ti te kobe ni, mbeni koli apusu ndulu na Muriel na lo tene na lo: “Ngbele ye so ala yeke ge, mbi yeke bâ fade ala. Na mbi bâ mbeni kota kangbi na popo ti amolenge ti mo na ala so mbi yeke bâ ka. Peut-être mo bâ awe lege so amolenge ayeke sala ye na atable nga na angende: ala zia gere ti ala na ndo ti table, ala yeke yengi angende mbage na mbage. Me amolenge ti mo aduti kpô mingi na ala sala ye nzoni. Ye nyen si mo sala?”

Muriel atene na lo: “Mbi na koli ti mbi e yeke manda lakue Bible na amolenge ti e; na ye so e manda dä e yeke tara ti sala ye alingbi na ni na yâ fini ti e. E yeke aTémoin ti Jéhovah.” Na mango tënë so, koli ni atene: “Mbi yeke Juif na mbi sö kuâ na yâ kota fango azo so aNazi asala. Mbi dabe mbi so mbi bâ lani a sala ngangu na aTémoin ti Jéhovah na Zamani. Même na ngoi ni so, salango ye ti ala lani ayeke nde. Salango ye ti amolenge ti mo apika bê ti mbi mingi. A lingbi mbi gi ti hinga ye na ndo vorongo Nzapa ti mo.”

Bible ayeke mbeni pendere buku ti fango lege na yâ batango amolenge. A-Témoin ti Jéhovah ayeke na nzara mingi ti mû maboko na azo ti wara nzoni na yâ fango lege so ayeke na yâ Mbeti ti Nzapa. E tisa mo na wâ ti yeda na ye so a hunda ge.