Ngoi ti tengo ye: Gi senge ngoi ti tengo kobe pëpe!
KOBE so anzere mingi ayeke zia ngia na bê ti zo oko oko kue. Tongana a zia lisoro nga na akamarade so mo ye ala mingi dä, ngoi ti tengo kobe ayeke ga mbeni pendere ngoi so ayeke kaï gi nzara pëpe, me a yeke sala ye mingi. Asewa mingi ayeke sala ngangu ti bungbi kamême fani oko lâ oko oko ti te kobe. Ngoi ti tengo kobe ayeke mû lege na sewa ni ti sala lisoro na ndo aye so asi na yâ ti lango ni wala na ndo aye so a leke ti sala. Ababâ na mama so ayeke dengi mê ti mä amolenge ti ala ayeke wara lege ti hinga mbeni ye na ndo ti abibe nga na atënë ti bê ti amolenge ni. Tongana ngoi ayeke hon, pendere ngoi so ala mû ni ti duti legeoko ti te ye asala si ala bâ so dutingo na sewa ayeke nzoni, ala yeke ndulu ti zia bê kue na mba nga ala ye tele; na ye so kue asala si sewa ni akpengba.
Laso, teti so mingi ti azo ti yâ ti mbeni sewa ayeke lakue na akua mingi ti sala, ala bâ so a yeke ngangu ti wara ngoi so ala kue alingbi ti duti na ndo oko ti te ye. Na ambeni kodoro, ngobo ti salango ye ti azo ni ake ti tene mbeni sewa ate ye place oko wala asala lisoro na ngoi ti tengo ye. Kua ti ambeni sewa ayeke ti zi télévizion na ngoi ti tengo ye, na ye so ayeke kanga lege na ala biani ti sala anzoni lisoro.
Ye oko, ababâ na mama so ayeke aChrétien ayeke ku kungo ti wara alege so azi ti kpengba azo ti da ti ala (aProverbe 24:27). Giriri, a tene na ababâ na mama so, tâ nzoni ngoi ti fa tënë ti Nzapa na amolenge ayeke ‘ngoi so ala duti na da ti ala’. (Deutéronome 6:7). Ti duti lakue na ndo oko ti te kobe azi mbeni pendere lege na ababâ na mama ti yôro yeke yeke na yâ bê ti amolenge ti ala ndoye teti Jéhovah nga na akpengba-ndia ti lo so ayeke mbilimbili. Na gingo ti sala si a duti mbeni ngoi ti ngia na ti nzerengo tele, mo lingbi ti sala si ngoi ti tengo kobe aduti mbeni ngoi so mo nga na sewa ti mo ayeke wara ngia na ayeke kpengba. Ni la, sala si ngoi ti tengo kobe aduti gi senge ngoi ti tengo ye pëpe!