Mo dabe mo na ni?

Dikongo anuméro ti Tour ti Ba Ndo so asigigi ade ti ninga pëpe anzere na mo? Tongaso, bâ wala mo lingbi ti kiri tënë na ahundango tënë so ge:

• Ye nyen mbeni Chrétien alingbi ti sala tongana lo woko na lege ti bibe nga na lege ti yingo?

A yeke kota ye ti tene e hinga ye so asala si e woko. A lingbi ti duti nzoni ti bâ yâ ti aye so e yeke sala lâ oko oko nga na akungba so e yeke na ni, na e zi aye so ayeke ne e senge senge. A lingbi na dutingo ti e, e ye ti zia na gbele e aye so e lingbi biani ti si dä. A yeke tâ kota ye ti bâ lege ti seni ti e na lege ti yingo; ye so ahunda sambela nga na gbungo li lakue.​—15/8, lembeti 23-26.

• Ngbanga ti nyen aTémoin ti Jéhovah abâ wungo 144 000 tongana tâ wungo?

Na peko ti so a sala tënë na bazengele Jean na ndo azo 144 000, lo bâ ‘azo mingi so asi singo, so zo oko alingbi diko ala pëpe’. (Apocalypse 7:4, 9). Tongana fade wungo 144 000 ayeke na lege ti fä, ka a lingbi pëpe ti bâ kota kangbi so ayeke na popo ni na azo mingi so asi singo. Jésus asala lani tënë ti azo so ayeke komande ande legeoko na lo tongana mbeni ‘kete kundu’. (Luc 12:32).​—1/9, lembeti 30.

• Ngbanga ti nyen mbeni zo ti Israël alingbi ti kä kuâ ti mbeni nyama so a sa mênë ti lo pëpe na mbeni wande?

Mbeni wande so ade ti mû peko ti vorongo ti aJuif pëpe ayeke lani na gbe ti Ndia pëpe. Tongaso, a zia lani lege na mbeni zo ti Israël ti mû wala ti kä mara ti anyama tongaso na lo (Deutéronome 14:21). Me ti mbeni wande so amû peko ti vorongo ti aJuif, Ndia akanga lege na lo, lo yeke te pëpe mara ti nyama tongaso so a sa mênë ti lo pëpe (Lévitique 17:10).​—15/9, lembeti 26.

• Tapande wa afa so azo ayeke haka peko ti aye so Nzapa aleke ti sigigi na aye, na ngbanga ti nyen a yeke mbeni ye so agbu bê ti aChrétien?

Aita Wright asigigi na mbeni lapara na peko ti so ala manda ye na ndo ti akota ndeke na hulungo ni. Mara ti aye so alingbi ti pusu mbeni Chrétien ti mû gloire na Wasalango ye.​—1/10, lembeti 9.

• Zo wa la a sala tënë ti lo na 2 aCorinthien 12:2-4 so a gue na lo na paradis?

Tënë so aga tâ gi na peko ti aversê so na yâ ni Paul afa ambilimbili ye so afa atene lo yeke bazengele. Teti so Bible afa pëpe mbeni zo nde so mara ti ye ni so asi na lo nga teti so Paul si afa na e ye ni so, a yeke peut-être Paul si awara suma so.​—15/10, lembeti 8.

• Asalango ye ti tele ti Jésus wa asala si lo lingbi ti sala kua tongana Mokonzi so Nzapa asoro?

Jésus abata lani be-biani ti lo na yâ ti aye kue, lo sala ye na lege ni nga mbilimbili. Lo mû tele ti lo kue na Nzapa. Jésus abi bê ti lo mingi na azo nga lo yeke na nzara ti sala kua..​—1/11, lembeti 6-7.

• Adémon ayeke duti ande na ndo wa na ngoi ti Komandema ti Ngu Saki Oko?

E lingbi biani ti tene so na ngoi ti Komandema ti Ngu Saki Oko ti Christ, a yeke bi ala na yâ bukulugbu-ti-bingo legeoko na Satan (Apocalypse 20:1-3). Genèse 3:15 asala tene kozoni ti nekango li ti ngbo ni, so andu nga dutingo ti lo na yâ bukulugbu-ti-bingo na ngoi ti Komandema ti Ngu Saki Oko. Na yâ hale ti Satan, a yeke wara a-ange ti sioni wala adémon. Teti so ala sala mbito ti bukulugbu-ti-bingo a fa so ala hinga nzoni mingi kanga so ayeke ku ala (Luc 8:31).​—15/11, lembeti 30-31.

• Ngbanga ti nyen a lingbi mbeni zo asala hange ti nyon sämba ahon ndo ni, atâa tongana lo yeke kpe ti tene sämba asala lo?

Ti ambeni zo, a yeke ngangu ti hinga so sämba asala ala atâa so ala nyon ni mingi. Ye oko, a yeke kete na kete si nzara ti sämba alingbi ti dü na bê ti mbeni zo na lo ga ‘ngbâa ti vin’. (Tite 2:3). Jésus agboto mê na ndo ziango si “tengo kobe na nyongo sämba mingi” ane bê ti e (Luc 21:34, 35). Kozoni si mbeni zo aga tâ ngbâa ti sämba, nyongo ye ahon ndo ni alingbi ti sala si lo yeke lakue ndulu ti lango na ti sala goigoi na lege ti mitele nga na lege ti yingo.​—1/12, lembeti 19-21.