Wango ti ndara wa Salomon amû na ndo dikongo ambeti?
“NDA ti salango mbeti mingi ayeke pëpe, na ti gi nda ti tënë ti mbeti alungula ngangu ti mitele.” (Zo-ti-fa-tene 12:14). Na sungo atënë so a sala laso ndulu na ngu 3 000 awe, Gbia ti ndara Salomon ti Israël aye lani ti kanga lege pëpe na azo ti diko mbeti. Nde na so, lo yeke sala lani tënë na ndo ambeti so azo alingbi ti soro ti diko. Biani, dango bê so lo mû alingbi na ngoi ti laso so na ndo lê sese kue a yeke sigigi na gbâ ti ambeti ngu oko oko.
Biani, “mbeti mingi” so Salomon ayeke sala tënë ni ayeke ambeti so ayeke kpengba wala ayeke mû dengo bê na zo pëpe. Tongaso, lo tene so tongana zo amû bê ti lo kue ti diko ni ahon ti tene a ga na zo mbeni ye ti nzoni so ayeke ngbâ, ‘a lungula ngangu ti mitele.’
Ye oko, Salomon aye ti tene so a yeke wara lâ oko pëpe ambeni buku so zo alingbi zia bê dä na so alingbi ti sala nzoni na zo so ayeke diko ni? Oko pëpe, teti lo tene nga: “Tënë ti zo ti ndara ayeke tongana keke ti fa lege na abagara, na tongana pointe so akanga ngangu. Berger oko amû tënë ti aproverbe so, na a bungbi tënë ni na mbeti.” (Zo-ti-fa-tene 12:13). Biani ambeni mbeti ayeke dä so ayeke tongana “keke ti fa lege na abagara,” na so ayeke mû maboko na zo ti wara mbeni nzoni bibe. Ala lingbi ti pusu zo ti sala ye na lege ni. Nga, legeoko tongana “pointe so akanga ngangu” ala lingbi ti mû maboko na zo ti luti nzoni nga ti wara ngangu ti sala ye so lo leke na bê ti lo ti sala.
E lingbi ti wara mara ti atënë ti ndara tongaso na ndo wa? Ti Salomon, atënë ti ndara so ayeke kota mingi ahon atanga ni kue ayeke ala so alondo na Jéhovah, oko Berger (Psaume 23:1). Tongaso, tâ nzoni buku so zo alingbi ti soro ti wara tâ ndara na yâ ni ayeke gi Bible. Ti diko lakue atënë so alondo na Nzapa alingbi ti mû maboko na zo ti ga mbeni zo so “alingbi kue, na [so awara] ye kue alingbi teti nzo kusala kue.”—2 Timothée 3:16, 17.