Mo yeke ku kungo mbeni sese so mbito ayeke dä pëpe?

“E yeke na yâ mbeni sese so a yeke gboto lakue lê ti zo ti bâ so mbeni ye ti sioni ayeke ndulu ti si na so. . . ngangu ti sala mbeni ye ngbanga ni ayeke dä pëpe; kpale ni so azo ahinga li ti ala na ni pëpe, na a lingbi ti si na ngoi ti bê ti lo sân ti tene zo aku tele ti lo na ni.”

NA NGU so ahon, a wara atënë so na yâ ti mbeti-sango Newsweek. Atënë ni afa na gigi bibe so azo mingi ayeke na ni na yâ ti sese ti wusuwusu so e yeke dä laso. Jésus Christ afa lani so na yâ ti mbeni ngoi so ayeke ndulu ti si, fade atënë so agbu bê ti zo ayeke mû ndo. Lo sala tënë ti prophétie ti mbeni ngoi so fade amara ayeke duti na kota gingo bê na ala yeke hinga pëpe tongana nyen ti hon ndo ni. Nga, fade azo ayeke kui na mbito ngbanga ti aye ti vundu so ayeke ga na ndo sese. Ye oko, a lingbi e zia pëpe si mbito ahon ndo ti e wala e bâ tele ti e so mbeni zo ti mungo maboko na e ayeke dä pëpe, teti Jésus atene: “Tongana ye so akomanse ti si, i yä lê ti i na li ti i na nduzu, teti lâ ti ton i aga ndulu.”​—Luc 21:25-​28.

Na salango tënë na ndo ti dutingo ti awakua ti lo na peko ti so ala sö kuâ, Jéhovah Nzapa atene: “Fade azo ti Mbi ­aduti na ndo ti siriri, na da so akpengba, na ndo ti hu tele.” (Esaïe 32:18). Na lege ti prophète ti lo Michée, Jéhovah atene: “Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbito na ala ayeke pëpe.”​—Michée 4:4.

So tâ kota kangbi si ayeke na popo ti ngoi so nga na gigi ti e ti fadeso! Fade mbeni kpale so a hinga nda ni pëpe na so ayeke ndulu ti sala sioni na azo ti sese ayeke duti dä mbeni pëpe. Nde na so, na place ti akpale so ayeke gboto lakue lê ti zo ti bâ so mbeni ye ti sioni ayeke ndulu ti si na so ngangu ti sala mbeni ye ­ndali ni ayeke dä pëpe, fade a yeke wara mbeni ­dutingo ti siriri na ti ngia so ayeke hunzi lâ oko pëpe.