Gingo ti wara ye mingi

“Tongana e yeke na nzara ti warango ye so ayeke hunzi pëpe, ye ayeke lingbi e lâ oko pëpe.”​—Tondo ti Worldwatch Institute.

“E YEKE na nzara ti wara aye wa? Ti wara aye kue. E ye ti wara ni lawa? Gi fade fadeso.” Na yâ ti ngu 1960 ti si na 1969, tënë ti sabango so amû ndo kue na yâ ti ambeni da senda-gi. Laso, atâa so a lingbi ti mä tâ gi a-oko tënë ti sabango so pëpe, kota tënë ti yâ ni angbâ. Biani, a hinga sese ti laso nzoni mingi ngbanga ti tombango peko ti gbâ ti aye ti mitele.

Ti azo mingi, ti wara gbâ ti mosoro nga na aye ti mitele ayeke ye so a lingbi zo azia ni na kozo ndo. Jimmy Carter, ngbele Président ti Amerika, atene mbeni lâ: “A yeke hinga zo mbilimbili ngbanga ti kua so lo yeke sala ni pëpe, me ngbanga ti akungba so lo yeke na ni.” Mbeni ye ayeke dä so ayeke kota mingi ahon akungba? Tongana a yeke tongaso, a yeke nyen? Na ye ti nzoni wa ayeke ga ande na pekoni?