Tondo ti awafango tënë ti Royaume

Mbeni lettre so alondo na Alejandra

TETI angu mingi, sungo alettre aga tâ mbeni lege ti fango tënë so alë lengo. Atâa so na ambeni ngoi, a lingbi ti hinga nzoni kue pëpe wala kode ti fango tënë so ayeke lë ande lengo, azo so angbâ ti sala ni ayeke wara gbâ ti adeba nzoni. Ala yeke dabe ti ala na wango ti ndara ti Bible so atene: “Na ndapelele mo lu le-kobe ti mo, na lakui mo duti senge pëpe, teti mo hinga pëpe fade ye so aga nzoni, tongana a yeke so ge wala so kâ, wala ala use kue aga nzoni.”​—Zo-ti-fa-tene 11:6.

Alejandra, mbeni maseka-wali so asala kusala teti ngu 10 na filiale ti aTémoin ti Jéhovah na Mexique, angbâ ti mû ayorö teti kobela ti cancer. Kobela ti lo aga ngangu mingi na lo lingbi mbeni pëpe ti sala akusala ti lo ti lâ oko oko. Ye oko, teti so lo ye ti ngbâ lakue ti fa tënë, Alejandra amû lani desizion ti sala ni na lege ti alettre. Lo sû alettre so na yâ ni lo sala tënë ti mandango Bible na azo senge senge na lo zia nga na yâ ni numéro ti téléphone ti mama ti lo. Na pekoni, lo mû alettre ni na mama ti lo ti tene mama ti lo ni azia ni na ayanga-da so akanga na ngoi so lo yeke fa tënë da na da.

Na oko ngoi ni, Diojany, mbeni maseka-wali ti kodoro ti Guatemala, ague ti sala kusala ti boi na Cancún, Mexique. Kâ, lo tingbi na aTémoin ti Jéhovah, na a nzere na lo ti sala lisoro na ndo ti Bible legeoko na ala. Na pekoni, apatron ti lo amû desizion ti zia Cancún na ti gue ti sala kodoro na kota gbata ti Mexique, tongaso ala ye si lo gue legeoko na ala. Me, Diojany agi bê ti lo kete kozoni ti gue ndali ti so tongana lo na apatron ti lo ague kâ, fade lo yeke wara lege ti sala lisoro na aTémoin ni mbeni pëpe.

Apatron ti lo atene na lo: “Mo gi bê ti mo pëpe. A-Témoin ayeke na yâ kodoro ni kue. Tongana e si kâ, fade e yeke gi ala hio.” Teti so lo yeke na beku ti wara ande aTémoin kâ, Diojany ayeda ti gue legeoko na apatron ti lo. Tongana ala si na kota gbata ti Mexique ni awe, apatron ti Diojany agi aTémoin ngbanga ti lo. Me ndali ti ambeni ye, ala wara lege ti tingbi na aTémoin pëpe atâa so na yâ ti gbata ni, wungo ti ala ahon 41 000 nga akongregation ayeke 730.

Kete na pekoni, bê ti Diojany ato nda ti nze ndali ti so lo de lo wara pëpe lege ti tingbi na aTémoin ti tene lo kiri lo to nda ti lisoro ti lo na ala na ndo Bible. Mbeni lâ, patron ti lo ti wali aga na tele ti lo na lo tene na lo: “Bâ tâ ye ti dongo bê! Nzapa ti mo amä asambela ti mo awe.” Na lo mû na Diojany mbeni lettre na lo tene na lo: “A-Témoin la azia lettre so na mo.” A yeke lettre so alondo na Alejandra.

Diojany awara lege ti tingbi na mama ti Alejandra nga na ita ti Alejandra ti wali so iri ti lo ayeke Blanca, na lo yeda ti manda Bible. Ambeni yenga na pekoni, lo tingbi na Alejandra na ala yeke na kota ngia ti bâ tele. Alejandra awa Diojany ti ngbâ ti sala ye alingbi na ye so lo yeke manda na yâ Bible, tongaso si lo lingbi ti maï na lege ti yingo.

Anze kete na pekoni, na juillet 2003, Alejandra akui. Na lo zia na amba ti lo wamabe mbeni pendere tapande ti mabe nga na ti salango ye na wâ. Na ngoi ti lungo kuâ ni, bê ti azo mingi so atingbi na Diojany apika ngbanga ti so ala mä lo tene: “Alejandra na sewa ti lo ayeke mbeni tapande ngbanga ti mbi. Na mbi leke na bê ti mbi awe ti sala na Jéhovah nga ti wara batême na yâ ngoi kete. Mbi yeke ku tâ kungo ti kiri ti bâ Alejandra na yâ Paradis so ayeke ga.”

Biani, lettre alingbi ti duti mbeni kete ye. Me, même mbeni lettre so ayo pëpe alingbi ti sala mbeni ye ti nzoni so aninga!