“A yeke tâ pendere ye so a lingbi mo sala ni”

ALEXIS ayeke mbeni kete molenge-koli ti ngu oku so alango na kodoro ti Morelia, na Mexique. Babâ na mama ti lo ayeke manda Bible nga ayeke gue na abungbi ti aTémoin ti Jéhovah. Na ngoi so lo na sewa ti lo ayeke na mbeni kota bungbi ti circonscription, lo bâ mbeni démonstration so a sala ni na ndo kusala ti fango tënë da na da. Mo ye ti bâ so, lo turne na mbage ti babâ ti lo, lo hunda lo: “Papa, papa, ngbanga ti nyen mo gue ti fa tënë pëpe?” Na babâ ti lo akiri tënë: “Mbi ngbâ ti manda Bible si mbi lingbi ti sala kusala so ande.” Alexis akiri tënë na ngia na bê: “Papa, a yeke tâ pendere ye so a lingbi mo sala ni.”

Kete molenge-koli so abâ nene ti salango ye alingbi na hingango ye so lo yeke na ni na ndo Jéhovah. Teti so lo na ambeni koya ti lo use ayeke lango na yâ ti da oko, lo yeke sambela Jéhovah kozoni, na pekoni lo yeke sala lisoro na ala na ndo ye so babâ na mama ti lo amanda na lo na yâ buku Mbeti ti atene ti Bible. Atâa so Alexis ade ti hinga ti diko mbeti pëpe, gi na lege ti afoto so ayeke na yâ ni, lo hinga atënë ti yâ ti buku so nzoni mingi. Lo tene même so lo ye ti gue ti sala vizite na azo na da ti ala ti kangbi legeoko na ala hingango ye ti lo na ndo aye so Nzapa aleke ti sala.

Biani, akete molenge legeoko na ambakoro ayeke mû fini ti ala ti sala ye alingbi na ye so Jéhovah, “Lo Ti Nzoni-kue”, aku ni na mbage ti ala. Tongaso, ala yeke na kota matabisi ti fa tënë ti témoin ti lo na popo ti amara (Esaïe 43:3; Matthieu 21:16). Kite ayeke dä pëpe so a yeke tâ pendere ye so a lingbi mbeni zo asala ni.