Azo ayeke na bezoin ti nzoni wango?

LASO, azo mingi abâ ti ala so ala yeke na ngangu ti zia kangbi na popo ti nzoni na sioni, na ala yeke na droit ti sala ye so bê ti ala aye. Ambeni atene so zo alingbi ti sala ye kue so lo ye gi tongana a ga na lo nzerengo tele. Mariage nga na dutingo ti sewa, so a bâ ni a ninga awe tongana mbeni ye so gere ti kodoro aluti na ndo ni, atingbi laso na aye ti ngangu mingi.​—Genèse 3:5.

Bâ mbilimbili ye so asi na Verónica,a na kodoro ti Mexique. Lo tene: “Ngoi kete kozoni si e sala matanga ti ngu 15 ti mariage ti e, koli ti mbi atene na mbi so lo yeke sala ndeko na mbeni wali. Na lo tene so teti so wali ni ade maseka, a nzere na lo mingi na lo yeke zia lo pëpe. Bê ti mbi aso ti bâ so tâ zo so mbi ndoye mingi aye tënë ti mbi mbeni pëpe, na lo ye nga pëpe ti ngbâ ti duti lakue ndulu na mbi. Mbi yeke pensé ti mbi kozoni so a yeke kuâ ti mbeni zo so mo ndoye mingi la ayeke zia tâ kota vundu na bê ti zo. Me mbi bâ so lango-sioni azia kota vundu na bê ti zo ahon kuâ, ngbanga ti so mbi girisa gi pëpe zo so mbi ndoye lo mingi me nga zo ni angbâ ti sala ye so ayeke zia kä na bê ti mbi.”

Na pekoni, a yeke tapande ti mbeni molenge-koli ti ngu 22 so asala divorce kozoni awe na so ayeke na mbeni kete molenge ti koli, me lo ye pëpe ti yô kungba ti lo ti babâ. Lo ku ti tene mama ti lo si abata lo nga na kete molenge ti lo ti koli so. Na tongana ye asi so mama ti lo ayeda pëpe na aye kue so lo hunda ni, lo yeke sala ngonzo, lo yeke zonga mama ti lo legeoko tongana mbeni molenge so ayeke na nzoni salango ye pëpe ayeke sala ka. Na mama ti lo abâ so lo yeke na ngangu ti sala ye oko pëpe na gbele mara ti salango ye ti ngangu tongaso.

Atapande ni ayeke gi ala so pëpe. Na ndo kue, kangbingo tele so ndia ayeda na ni nga na divorce ayeke gue na li ni mingi. Amolenge mingi ayeke bâ babâ wala mama ti ala adö ala azia ti gue ti leke mbeni fini sewa. Ambeni maseka ayeke na yekiango ndo oko pëpe na mbage ti azo, même na mbage ti ababâ wala mama ti ala, nga ala yeke bi tele ti ala na yâ ti ambeni tambela so ambeni zo ti giriri ahinga ni pëpe. Na ando mingi, amolenge abi tele ti ala na gingo alege nde nde ti wara nzerengo tele ti bungbingo koli na wali, nyongo mbangi, salango ngangu nga ti fâ awafango-mbeti wala babâ na mama ti ala. Mo lingbi ti bâ so mariage nga batango molenge ayeke gi pëpe aye so ayeke na gbele kpale na yâ sese ti laso.

Na ngoi so e yeke bâ tâ na lê ti e maïngo ti aye so, e lingbi ti hunda tele ti e ye wa ayeke si na azo. Tongana azo ahinga biani ti zia kangbi na popo ti nzoni na sioni, ngbanga ti nyen gbâ ti akpale angbâ gi tongaso sân ti tene a leke ni? Azo ayeke na bezoin ti mbeni nzoni wango? Mbeni lingu ti nzoni wango tongaso ayeke dä so azo ayeke zia bê na ndo ni? Atâa so azo mingi atene so ala mä na bê na Nzapa nga na Tënë ti lo, ye so asala ngangu pëpe na ndo adesizion ti ala. Me aye ti nzoni wa alingbi ti ga tongana e gi ti wara wango so alondo na mbage ti Nzapa? Zia e bâ article so ayeke ga.

[Kete tënë na gbe ni]