Asambela ti mo alingbi ti sala ngangu na ndo akpale ti mo?

ZO WA na popo ti e ade awara pëpe mbeni kota kpale so ahon ndo ti lo? Bible afa so bazengele Paul ahinga lani so sambela alingbi ti sala ngangu na ndo akpale so ayeke si na zo.

Na ngoi so a kanga Paul senge senge na Rome, lo hunda afon lo wamabe ti sambela teti lo, lo tene: ‘Tâ ye so mbi hunda na i mingi ayeke ti tene i sambela si mbi lingbi ti wara lege hio ti kiri na popo ti i.’ (aHébreu 13:18, 19, Fini Mbuki, 2001). Na mbeni ngoi nde, Paul afa na gigi mabe so Nzapa ayeke kiri tënë na asambela so a sala ti tene a zi lo hio (Philémon 22). A zi lani Paul hio na da ti kanga, na lo kiri lo to nda ti kusala ti lo ti missionnaire.

Ye oko, sambela alingbi biani ti sala ngangu na ndo ti akpale ti mo? Peut-être a yeke tongaso. Me, dabe mo so sambela ayeke pëpe mbeni senge ye ti vorongo so a sala ni gi tongaso. A yeke biani mbeni tâ lisoro na Babâ ti e ti ndoye na ti ngangu so ayeke na yayu. A lingbi e duti na kite pëpe ti fa anzene nzene tënë ti bê ti e na yâ asambela ti e me na pekoni, e ku na be-nze-pepe ti bâ lege so Jéhovah ayeke kiri tënë na ni.

Nzapa alingbi pëpe ti kiri tënë polele na asambela oko oko kue, nga lo lingbi pëpe ti kiri tënë na mbeni lege wala na ngoi so e ku ni. Paul, na tapande, asambela fani mingi ngbanga ti “kî na yâ tele” ti lo. Atâa so ye ni ayeke lani tongana nyen, Nzapa azi kpale ti Paul pëpe; me lo dë bê ti Paul na lege ti atënë ti kpengbango zo so: “Grâce ti Mbi alingbi na mo, teti na ndo so ngangu ayeke pëpe, ngangu ti Mbi alingbi kue.”​—2 aCorinthien 12:7-9.

E nga kue e lingbi ti duti na mabe so même tongana Nzapa alungula pëpe mbeni kpale ti e, lo lingbi ti ‘leke lege ti sigigi, si e lingbi gbu ngangu.’ (1 aCorinthien 10:13). Na yâ ngoi kete, fade Nzapa ayeke hunzi biaku pasi ti azo kue. Ti ku na ngoi ni so, bingo lê na mbage ti ‘Lo so Lo mä sambela’ alingbi ti sala ngangu na ndo akpale ti e.​—Psaume 65:3.