Tondo ti awafango tënë ti Royaume
‘Ga mo sala na e’
NA JUILLET 2000, a tokua mbeni tisango ndo na aTémoin ti Autriche, ti Zamani nga na ti Suisse so ayeke tene yanga ti Zamani ti gue na Bolivie. Ngbanga ti nyen? A yeke ngbanga ti so ambeni bungbi ti azo ti fango yaka, aMennonite, so ayeke tene yanga ti Zamani na so alango gi ala oko na ando so angoro kodoro ti Santa Cruz, Bolivie, mbage na mbage kilomètre 300 afa na gigi mbeni kota bingo bê na ndo Bible.
A-Témoin ndulu na 140 ayeda na tisango ndo so. Ambeni ague kâ teti ayenga mingi pëpe, nga ambeni teti ngu oko wala ngu mingi. Na salango tongaso, ala fa na gigi mara ti oko bibe ti amissionnaire ti kozo siècle so ayeda na tisango ndo so: “Ga na Macédoine, mo sala na e.”—Kusala 16:9, 10.
Kusala ti fango tënë na yâ territoire so ayeke tongana nyen? Mbeni ancien na yâ ti kongregation ti ndo ni atene: “Ti gue na mbeni oko ti ando 43 so aMennonite alango dä, na ndo alege so a zia goudron dä pëpe tongana a gue na mbeni ngangu kutukutu, alingbi ti mû ngbonga miombe. Ti gue ti sala vizite na ando so ayo mingi, a hunda mingi ni ti sala lango osio na lege na nga ti lango na ambeni bï na gbe ti atente. Me, a yeke ga biani na aye ti nzoni, teti mingi ti azo so ade amä lâ oko pëpe nzo tënë so.”
Kozoni kue, mingi ti aMennonite ayeda na fango tënë ni na ngia pëpe. Ye oko, angangu so a sala ni lege mingi amû maboko na ala ti yeda na ye so aTémoin aga na ni na ala. Na tapande, mbeni wafango yaka ni atene so a sala ngu oko awe so lo yeke diko mbeti-sango Réveillez-vous! Na pekoni, lo tene na ndo ni: “Mbi hinga so azo mingi na ndo so ayeda pëpe na ye so i yeke fa, me mbi mä na bê so a yeke tâ tënë.” Na yâ mbeni bungbi ni nde, mbeni koli atene: “Ambeni zo so alango ndulu na tele ti da ti mbi atene so i yeke aprophète ti wataka, na ambeni nde atene so i yeke na tâ tënë. Mbi ye ti hinga ti mbi mveni.”
Mbeni kongregation ti yanga ti Zamani ayeke fadeso na Bolivie, a yeke na awafango tënë 35 so na yâ ni awafango tënë ti ngoi kue ayeke 14. Juska fadeso, angbele Mennonite 14 aga awafango tënë ti Royaume, na ambeni 9 ayeke ga lakue na abungbi. Mbeni mbakoro-koli so awara batême ade ti ninga pëpe atene: “E bâ polele fango lege ti Jéhovah. Lo tokua na mbage ti e aita-koli na aita-wali, so ayeke tene yanga ti Zamani na so ayeke na akode, ti mû maboko na e. E kiri tâ singila.” Molenge ti lo ti wali ti ngu 17, so nga awara batême, atene na ndo ni: “Wâ ti amaseka-koli na amaseka-wali so aga ge ayeke mbeni ye so ayeke pusu zo na kusala. Mingi ti ala ayeke apionnier so amû ngoi na nginza ti ala ti mû maboko na ambeni zo. Ye so apusu mbi ti yeda ti sala legeoko tongaso.”
Kite ayeke pëpe, ala so amû tele ti ala ti “ga” ti mû maboko awara kota ngia nga na nzerengo tele.