Gingo lege ti zia ngia na bê ti Nzapa

NA YÂ buku ti lo Nzapa: Mbeni kete mbaï (Angl.), John Bowker asû tënë so: “A wara lâ oko pëpe na yâ mbaï mbeni bungbi ti azo so amä na bê pëpe na Nzapa; na mingi ni, abungbi ti azo ni ayeke bâ Nzapa tongana Lo so akomande ndagigi kue nga Lo so aleke aye kue. Ye so ayeke tâ tënë même teti abungbi ti azo so asoro na bê ti ala mveni ti zia pëpe si mabe na Nzapa akomande dutingo ti ala.” Atâa lege so a mû ti sala na ni ayeke tongana nyen, gingo ti wara Nzapa na ti zia ngia na bê ti lo aga mbeni ye so alï ngangu mingi na yâ salango ye ti azo. Na ndo sese mobimba, azo mingi aye biani na bê ti ala kue ti zia ngia na bê ti Nzapa. Me ti bâ ni nzoni, lege so ala yeke tara ti zia ngia na bê ti Nzapa ni ague nde nde, alingbi na mabe so ala oko oko ayeke na ni.

Na mbeni mbage, a yeke wara ala so amä na bê so ye kue so a hunda na zo ti sala ni, si Nzapa ayeda na lo, ayeke gi ti duti na mbeni nzoni tambela na yâ fini awe. A yeke wara nga ambeni zo ni nde so abâ ti ala so a yeke na mungo ye na awanzinga si Nzapa ayeke yeda na ala. Nga, a yeke wara azo gbâ ni so ayeke bâ na nene ni mingi amatanga nga na angobo ti salango ye so andu vorongo.

Na mbeni mbage ni nde nga, a yeke wara ala so atene ti ala so Nzapa ayo na ala mingi wala lo yeke na aye mingi ti sala, si ngoi ayeke na lo pëpe ti bi bê na ndo asenge zo. A tene so wasenda-ndara Épicure ti Grèce ti giriri amä na bê so ‘anzapa ayo tâ mingi na azo, na a sala si ala lingbi ti sala mbeni ye ti sioni wala nzoni oko pëpe na ala.’ Ye oko, azo mingi so laso ayeke na mara ti abibe tongaso ayeke na yâ mbeni lege ti vorongo. Ambeni alingbi peut-être même ti mû asandaga na ti sala ambeni ye nde so nda ni ayeke ti dë bê ti akotara ti ala so akui awe.

Mo tene ti mo nyen na ndo ni? Nzapa ayeke bi bê ti lo biani na angangu so e yeke sala ti nzere na lê ti lo? Lege ayeke dä teti e ti sala mbeni ye so andu bê ti Nzapa na ti zia ngia na bê ti lo?