Bible amû maboko na lo ti hon ndo ti atara

Atara asi singo na yâ ti sese ti laso. A yeke kete ye pëpe ti ngbâ ti bata akpengba-ndia ti Bible. Na tapande, a lingbi ti duti ngangu ti mû peko ti wango ti Bible so: “Kpe ye ti pitan!”​—1 aCorinthien 6:18.

Mbeni ti aTémoin ti Jéhovah, so e yeke hiri lo Sébastien, asala lani kusala na Pologne na yâ ti mbeni ndokua so kota biröo ni ayeke na Scandinavie. A lingbi lo sala ngangu ti bata be-biani ti lo.

Akamarade ti lo ti place ti kua ahinga lo tongana Témoin ti Jéhovah. Apatron ti lo ayeke gonda lo mingi teti salango kusala ti lo na wâ nga na nzoni salango ye ti lo, ye so asala si ala mû na lo amatabisi mingi. Na pekoni, lo bâ so amatabisi so ayeke hunda na lo ti duti na yâ ti ambeni bungbi so a yôro na yâ ni angia so ayeke nzoni pëpe.

Ngoi kete na pekoni a ninga kete, Sébastien ato nda ti gi bê ti lo. “Patron ti mbi ahinga mbi yeke oko ti aTémoin ti Jéhovah. Nda ni la si lo zia bê ti lo kue na mbi na lo zia akungba mingi na tïtî mbi. Tongana mbi ke ti mû mbage ti mbi na abungbi so, fade mbi yeke girisa kua ti nginza ti mbi, kua so a yeke lani tâ ngangu ti wara ni. Ye nyen ayeke si tongana mbi gue mbi bâ gi ni na lê senge na mbi mû mbage dä pëpe?”

Na pekoni, Sébastien aga ti hinga ye mingi ahon ti kozo na ndo ye so ayeke ku lo ti sala kâ. A yeke ku lo ti “bata nzoni” aclient so alondo na kodoro wande na gingo “awali” ti sigigi na ala na lakui nga ti bungbi na ala. A lingbi lo sala nyen?

Sébastien amû desizion ti dabe ti patron ti lo na ndo bango ndo ti lo ti Bible na ndo ye ti pitan. A ninga pëpe, Sébastien abâ so ndo so lo sala kua dä alingbi na lo pëpe, na ye so ayeke gue ande na lo ti zia kusala ti lo so. Lo wara mbeni fini kua so ayeke futa lo na mbeni nginza so ayeke kete me mara ti atara tongaso ayeke dä pëpe. Fadeso lo yeke na nzoni yingo-ti-hinga.

Mo yeke sala nyen tongana mbeni zo apusu mo ti bi tele ti mo na yâ ye ti pitan wala ti kanga lê na ndo ni? Tongana a yeke mo fade, mo yeke duti ndulu ti gbian ye ti ngangu tongaso? A yeke ye so Joseph asala ni giriri na so a fa pekoni na Genèse 39:7-12.