Mabe alingbi ti sava zo ti kobela?

TONGANA e tï kobela, e yeke gi ti tene a kaï kobela ti e si e wara dengo bê. Peut-être mo diko na yâ Bible awe so fani mingi Jésus akaï mara ti akobela nde nde kue, na azo so lo kaï kobela ti ala awara dengo bê na pekoni. Lo kaï lani akobela so na lege ti nyen? Bible atene so ayeke na lege ti “ngangu ti Nzapa.” (Luc 9:42, 43; Kusala 19:11, 12). Tongaso, a yeke lani yingo vulu ti Nzapa si akaï akobela so, pëpe gi mabe ti azo ni (Kusala 28:7-9). A yeke ngbanga ni la si Jésus ahunda pëpe na azo ti kobela ni ti fa na gigi mabe ti ala na lo kozoni si kobela ti ala alingbi ti hunzi.

Mo lingbi peut-être ti hunda tele ti mo: ‘Akaïngo kobela na lege ti ye ti kpene aga ngbele ye awe? Wala akaïngo kobela tongana ti so Jésus asala giriri alingbi ti kiri mbeni lâ? Beku wa ayeke teti ala so ayeke bâ pasi laso na mbeni ngangu kobela, wala mbeni kobela so alingbi ti kaï ni pëpe?’

Bible afa so na yâ fini sese ti Nzapa so mbilimbili ayeke duti dä, fade ngangu ti Nzapa alingbi ti kiri ti sala mara ti kaïngo kobela na lege ti ye ti kpene so, tongana ti so Jésus asala giriri na ngoi so lo yeke na ndo sese. A-Témoin ti Jéhovah so ayeke ndulu na ndo so mo lango dä, ayeke duti ande na ngia ti fa na mo tongana nyen na lawa si fade Nzapa ayeke sala aye so zo so asava azo na lege ti mabe alingbi ti sala ni lâ oko pëpe: ti zi akobela kue legeoko na kui. Biani, fade Nzapa “ahunzi kui teti lakue lakue”.​—Esaïe 25:8.