Awakua ti Nzapa ayeke tongana akeke—Tongana nyen?
NA SALANGO tënë ti zo so ayeke na ngia ti diko akpengba-ndia ti Bible na ti sala ye alingbi na ni na yâ fini lo, wasungo psaume atene: “Lo yeke tongana keke so a lu na tele ti ngu so ayeke sua, keke so alë na ngoi ti lo, kugbe ti lo ahule nga pëpe. Na ye kue so zo so asala aga nzoni.” (Psaume 1:1-3). Ngbanga ti nyen hakango ye so alingbi biani na ni?
Akeke alingbi ti ninga angu mingi. Na tapande, a tene so ambeni keke ti olive na akodoro so ayeke na tele ti ngu ti Méditerranée ayeke na ngu saki oko wala use tongaso. Legeoko nga, akeke ti baobab na bê ti Afrika ayeke ninga angu mingi, nga a tene so mbeni keke na Californie ayeke na ngu 4 600 tongaso. Na yâ ti gbako, fani mingi akota keke ayeke sala nzoni na tanga ti aye so angoro ala. Na tapande, ayongoro keke ayeke mû gbe ti dê na akete ni, na akugbe ti ala so atï na sese asala si sese ni aga nzoni.
Mingi ni, akeke so ayo ahon atanga ni kue ayeke kono na ndo oko na yâ ti agbako, si ala mû maboko na mba ti luti. Teti so gere ti ala alingbi ti lï na popo ti mba, gbâ ti akeke, tongana ala yeke na ndo oko, alingbi ti luti nzoni mingi na gbele mbeni kota pupu ahon mbeni keke so akono gi lo oko na mbeni ndo so gi apele si ayeke dä. Agere ti keke so ayeke gbâ ni amû nga lege na lo ti wara na gbe ti sese ngu so alingbi na ni nga na ambeni ye nde so asala si lo maï nzoni. Ti ambeni keke, agere ni alingbi ti lï ngangu na gbe ti sese ahon yongo ti keke ni na nduzu. Wala agere ni alingbi ti gboto yâ ti ala mbage na mbage ahon konongo ti li ti keke ni na amaboko ni kue.
Bazengele Paul asala lani tënë ti mbeni keke tongana lo fa so a lingbi aChrétien ‘atambela na yâ Lo [Christ], ala ga tongana keke so gere ni alï na sese, ala maï na yâ Lo, na ala kpengba na yâ mabe’. (aColossien 2:6, 7). Biani, aChrétien alingbi ti luti nzoni gi tongana gere ti ala alï ngangu na yâ Christ.—1 Pierre 2:21.
Na mbeni lege nde wa a lingbi ti haka awakua ti Nzapa na akeke? Akeke so ayeke kono na ndo oko ayeke mû maboko na popo ti ala ti luti na nduzu. Legeoko nga, azo kue so angbâ ndulu na kongregation ti aChrétien ayeke wara mungo maboko ti amba ti ala awamabe (aGalate 6:2). A-Chrétien biazo, so ayeke be-ta-zo nga so gere ti ala alï ngangu na lege ti yingo, ayeke mû maboko na afini wamabe ti luti ngangu na yâ mabe, même na gbele kangango lege so ayeke tongana kota pupu (aRomain 1:11, 12). Afini Chrétien alingbi ti maï nzoni na ‘gbe ti dê’ ti awakua ti Nzapa so ayeke na kode mingi ahon ala (aRomain 15:1). Nga azo kue so ayeke ti kongregation ti aChrétien na ndo sese mobimba ayeke wara nzoni na lege ti kobe ti yingo so akpengba zo, so “akeke ti mbilimbili,” wala tanga ti ala so a sa yingo na ndo ti ala, ayeke mû ni.—Esaïe 61:3.
So tâ ye ti ngia si awakua kue ti Nzapa ayeke na ni ti duti na beku ti bâ gango tâ tënë ti zendo so ayeke na Esaïe 65:22, so atene: “Fade lâ ti azo ti Mbi ayeke mingi tongana lâ ti keke.”
[Lingu ti foto na lembeti 28]
Godo-Foto