Mbeni nzo yingo-ti-hinga

MBENI lâ, tongana lo londo na kua ti kiri na kodoro, Charles, mbeni zo ti kua na yâ mbeni da senda-gi ti Kenya, agirisa téléphone ti lo ti maboko. Na Kenya, atéléphone ti maboko angbâ lakue ti duti aye ti kota ngele mingi.

Charles atene: “Mbi yeke ku pëpe ti tene mbeni zo akiri ni na mbi.” Ye oko, akete lango na pekoni, bê ti lo adö tongana filiale ti aTémoin ti Jéhovah ti Kenya apika singa na lo. Tongana a hunda lani na lo ti ga ti mû téléphone ti lo, a yeke tâ ngangu na lo ti yeda na tënë so lo mä ni! A tene lani na lo so mbeni wakua ti ngoi kue ti aTémoin ti Jéhovah ama na yâ oko kutukutu so Charles ayeke na yâ ni na lo wara téléphone ni. Na yâ ngangu kue so lo sala ti gi ti wara mveni ti téléphone ni, wakua ni ague na téléphone ni na biröo ti filiale, na nda ni awakua so amû tele ti ala mveni ti sala kua kâ awara iri ti Charles na gingo numéro so asigigi na yâ téléphone ni.

Na yâ ti mbeni lettre so lo sû na biröo ti filiale, Charles atene: “Mbi yeke na bê ti kiri singila teti angangu kue so ala sala ti tingbi na mbi atâa akpale so andu ni. Mbi mû singila na bê ti mbi kue na azo ti bungbi ti i so awara téléphone so, a gi ngangu ti hinga so a yeke ti mbi, na a kiri ni na mbi. A yeke ngangu ti wara mbeni zo so ayeke sala ye na lege ni laso. Ye oko, a yeke ye ti mungo ngangu na zo ti bâ so e yeke kamême na ambeni zo oko oko so aluti ngangu tongana atâ Témoin ti Jéhovah Nzapa.”

Na ndo kue, a hinga aTémoin ti Jéhovah teti salango ye ti ala na lege ni. Ala mû tapande ti bazengele Paul so atene: “E hinga e yeke na nzo yingo-ti-hinga, na e ye ti tambela na lege so alingbi na yâ ye kue.” (aHébreu 13:18; 1 aCorinthien 11:1). Ala hinga so mara ti tambela tongaso ayeke mû gloire na Jéhovah Nzapa tongana ti so Jésus atene: “I zia lumière ti i aza na gbele azo, si ala lingbi bâ nzo kusala ti i, na ala mû gloire na Babâ ti i so ayeke na yayu.”​—Matthieu 5:16.