Bê ti mo ayeke dö na gbele aye?

MO YEKE bâ so fani mingi bê ti awasungo Bible ayeke dö tongana ala yeke bâ akusala nga na alengo ti Nzapa? Wasungo psaume atene: “Lege so Mo sala mbi ayeke ye ti dongo bê.” (Psaume 139:14). Prophète Esaïe asû na mbeti: “O L’Eternel, Mo yeke Nzapa ti mbi; fade mbi yä iri ti Mo, na mbi sepela iri ti Mo, teti Mo sala kota ye mingi.” (Esaïe 25:1). Wala bi bê na ndo dongo bê nga na kpengo mbito so asigigi na yâ atënë ti bazengele Paul: “Mosoro na ndara na hingango ye ti Nzapa ayeke kota mingi!”​—aRomain 11:33.

Ti dö na gbele aye ayeke mbeni bibe so aga na peko ti mbeni ye so zo aku ni pëpe, ye so zo ahinga ni nzoni pëpe, wala mbeni ye so zo ahinga ti fa nda ni pëpe, mbilimbili mbeni ye so asi gi tongaso so abungbi ni na yekiango ndo nga na nzara ti hinga nda ti ye wala ambeni ye tongaso.

A nzere mingi pëpe ti bâ akete molenge so bê ti ala adö na ala zi yâ ti lê ti ala kota tongana ala mä, ala ndu wala ala bâ afini ye? Mawa ni ayeke so fani mingi, tongana mbeni zo aga kangba, mara ti dongo bê tongaso, so aluti na ndo nzara ti hinga nda ti ye wala mbeni fini ye, ayeke kiri na peko.

Ye oko, ti awasungo Bible so a sala tënë ti ala fade, bê so adö na gbele aye aga ye ti tele ti ala. A yeke ninga. Ngbanga ti nyen? Ngbanga ti so ala yeke lë ni na gbungo li na ngia na ndo akusala ti Nzapa. Wasungo psaume atene na yâ sambela: “Mbi dabe mbi na lâ ti giriri; mbi bi bê ti mbi na kusala ti Mo kue; mbi bi bê ti mbi na kusala [ti kpene] ti tïtî Mo.”​—Psaume 143:5.

So tâ ye ti gonda ti wara na popo ti awakua ti Nzapa ti ngoi ti e mara ti dongo bê tongaso! Mo yeke na ni? Mo yeke gi ti lë ni?