Tondo ti awafango tënë ti Royaume

Mbeni limon na télé apusu lo ti mû gloire na Nzapa

BAZENGELE Paul atene so “ambeni zo afa tënë ti Christ teti bê asala ala, ala gi tënë; na ambeni afa tënë na lege ti nzobe.” (aPhilippien 1:15). Ngoi na ngoi, même azo so ayeke tara ti buba iri ti awakua ti Jéhovah, atâa so ala ye ti sala ni pëpe, ala yeke pusu azo ti bê ti mbilimbili ti ga na mbage ti tâ tënë.

Na novembre ngu 1998, mbeni limon na télé ti France afa foto ti Béthel, biröo ti filiale ti aTémoin ti Jéhovah na Louviers, na France. Atâa so bango ndo ti azo ayeke nde nde na ndo ni, limon ni aga na mbeni ye ti nzoni na mbeni lege so zo aku ni pëpe.

Anna-Paula ayeke lani na popo ti azo so abâ limon ni. Lo lango ayo gi akilomètre 60 na Béthel. Anna-Paula na koli ti lo afâ yâ ti mariage ti ala awe. Lo yeke na amolenge use na lo yeke gi lani mbeni kua. Tongaso na ndade ni na ndapelele, lo pika singa na Béthel ti hunda wala lo lingbi ti wara kua kâ. Lo tene: “Limon ni asala si mbi bâ a yeke mbeni pendere ndo, nga kua so azo ni ayeke sala kâ ayeke nzoni.” A yeke tâ ye ti dongo bê tongana lo mä lani so azo kue so asala kusala na Béthel ayeke awakua so amû ngoi ti ala ti sala kusala senge! Na peko ti mbeni kete lisoro na ndo akusala ti aTémoin ti Jéhovah, lo yeda ti tene mbeni Témoin asala vizite na lo.

Na ngoi so Léna, mbeni wakua ti ngoi kue ti kongregation ti kodoro so Anna-Paula alango dä asala vizite na lo, ala sala yongoro lisoro, na Anna-Paula ayeda ti mû buku Hingango Ye So Ague na Fini ti Lakue Lakue.a Tongana lo ga na vizite ti peko Anna-Paula adiko buku ni kue awe na lo yeke na gbâ ti ahundango tënë. Lo yeke ndulu ti yeda ti manda Bible. Anna-Paula atene: “Ti mbi, a yeke lani lege so azi na mbi ti hinga Tënë ti Nzapa. Kozoni, Bible andu ti lo maboko ti mbi lâ oko pëpe.”

Na janvier ngu 1999, Anna-Paula ague abâ Béthel, nga na yenga ti pekoni lo gue na kozo bungbi ti lo ti aChrétien. Ngoi kete na pekoni, lo to nda ti manda Bible na amolenge ti lo nga ti fa tënë na akamarade ti lo. Lo tene: “Mbi lingbi pëpe ti bata teti mbi mveni ye so mbi manda. Mbi ye ti fa tâ tënë ti Bible na azo na ti dë bê ti ala.” Na pekoni so lo sala ngangu ti hon ndo ti ambeni kpale ti lo mveni, Anna-Paula ato nda ti gue na abungbi lakue. Lo gue na li ni hio mingi na lo wara batême na lango 5 ti mai ngu 2002.

Na ndo ni, ye ti peko ti nzoni tapande ti Anna-Paula nga na wâ ti lo na yâ fango tënë ayeke so, mama ti lo ato nda ti manda Bible nga, na yâ ngoi kete, lo mû batême. Anna-Paula atene: “Mbi hinga tënë so mbi lingbi ti tene ti fa peko ti ngia ti mbi pëpe. Lâ oko oko mbi yeke kiri singila na Jéhovah teti so lo mû lege na mbi ti hinga na ti sala na lo nga teti aye ti nzoni kue so lo sala na mbi.”

[Kete tënë na gbe ni]

[Afoto na lembeti 8]

Na nduzu: Anna-Paula

Na gbe ni: Yanga ti gbagba ti filiale ti France