Mbeni sese so kengo ndia ayeke dä pëpe

GBU li ti mo kete, tara ti bâ mbeni sese so azo ti kengo ndia ayeke dä pëpe! So ti tene a hunda mbeni pëpe ti wara lapolisi, ada ti kanga wala alege ti fango ngbanga na ndo azo ti kengo ndia so a hunda nginza mingi na so a yeke ngangu ti sala ni. A lingbi ti duti mbeni sese so zo oko oko ayeke bâ na nene ni fini na akungba ti mba ti lo. Mo lingbi ti tene so anzoni ye tongaso alingbi ti si lâ oko pëpe, ni la pëpe? Ye oko, pendere gbiango ye tongaso, a yeke tâ biani ye so Bible amû zendo ni. Ngbanga ti nyen ti bâ pëpe ye so Mbeti ti Nzapa asala tënë ni kozo na ndo kengo ndia nga na ambeni ye ti sioni ti sese so?

E yeke diko na yâ buku ti Psaume: “Zia bê ti mo agi mo pëpe tënë ti azo so asala sioye, na bê asala mo pëpe ngbanga ti ala so asala kirikiri. Fade a fâ ala na sese fade fade tongana pele, na fade ala kpi tongana fini kasa. Me azo so ayeke na tâ be-ti-molenge, fade sese ni aga ye ti héritier ti ala, fade ala wara ngia na yâ siriri so awu mingi.” (Psaume 37:1, 2, 11). Biani, zo oko alingbi pëpe ti kanga lege na Nzapa ti sala si zendo so nga na ambeni zendo ti lo ti dengo bê aga tâ tënë.

Nzapa ayeke ga na adeba nzoni so na lege ti Royaume ti lo. Na yâ Sambela ti Seigneur, Jésus Christ afa lani na adisciple ti lo ti sambela si Royaume ni aga ti tene ‘a sala na sese ye so bê ti Nzapa aye legeoko tongana ti so a sala na yayu’. (Matthieu 6:9, 10). Na yâ ngoi kete, na gbe ti Royaume so, fade nzinga, sioni komandema wala bibe ti kion, ayeke pusu zo oko pëpe ti sala sioni. Nde na so, Tënë ti Nzapa atene: “Fade le-kobe ayeke mingi na sese na li ti ahoto.” (Psaume 72:16). Biani, fade Jéhovah Nzapa ayeke mû na zo oko oko kue na ndo sese aye ti nzoni so ayeke hunzi lâ oko pëpe. Kota ye ni ayeke so, fade bungbi ti azo ayeke luti na ndo ndoye ti Nzapa nga ti azo so ayeke ndulu na ala, na kengo ndia ayeke kiri ande mbeni lâ oko pëpe ti buba sese.