‘I bungbi tele pëpe na gbe ti joug so alingbi pëpe’
TONGANA ti so mo lingbi ti bâ ge, dutingo ti chameau na koli-bagara so ayeke fâ yaka legeoko ayeke nzoni pëpe. Joug so abungbi ala legeoko, so aleke ni teti anyama use so konongo ti ala na ngangu ti ala kue ayeke legeoko, ayeke sala pasi na anyama ni use kue. Na bingo bê na ndo nzoni duti ti mara ti anyama ti gbotongo ye tongaso, Nzapa atene na amolenge ti Israël: “A lingbi mo kanga bagara na lele na charrue ti mo pëpe ti fâ yaka ti mo.” (Deutéronome 22:10). Oko kpengba-ndia so andu mbeni koli-bagara na mbeni chameau.
Ti bâ ni nzoni, mbeni zo ti fango yaka alingbi pëpe ti ga na mbeni ye ti kpale tongaso na ndo ti anyama ti lo. Ye oko, tongana lo yeke na akoli-bagara use pëpe, lo lingbi ti bungbi legeoko na gbe ti joug anyama use kue so lo yeke na ni. A lingbi ti tene so a yeke ye so zo ti fango yaka ti siècle 19, so ayeke na lê ti foto so ge, ayeda ti sala ni. Teti so konongo ti ala na nengo ti ala use kue alingbi tele pëpe, mbeni nyama ni so awoko kue ayeke tiri ngangu ti tambela legeoko tongana mbeni, na lo so ayeke na ngangu mingi ayeke na mbeni kota kungba ti yô.
Bazengele Paul asala lani kusala na tapande ti mbeni joug so alingbi kue pëpe ti fa na e mbeni kpengba ye ti manda. Lo sû na mbeti: “I bungbi tele ti i pëpe [na gbe ti joug so alingbi pëpe] na azo so amä na bê pëpe. Mbilimbili asala beoko na siokpari? Lumière asala beoko na bingo?” (2 aCorinthien 6:14). Tongana nyen mbeni Chrétien alingbi ti bungbi na gbe ti mbeni joug so alingbi pëpe?
Mbeni lege ni ayeke so tongana mbeni Chrétien asoro ti sala mariage na mbeni zo so asala mbeni nzapa nde. Mara ti mariage tongaso ayeke ga na kpale na azo ni use kue. Mango tele ayeke duti dä pëpe na ndo ambeni kpengba tënë.
Tongana Jéhovah aleke ândö gere ti mariage, lo mû na wali kungba ti duti mbeni zo “so alingbi na [koli]”. (Genese 2:18). Tongaso nga, na lege ti prophète Malachie, Nzapa asala tënë ti mbeni wali tongana mbeni “fon” zo. (Malachie 2:14). Wasalango e aye si azo so asala mariage asala kusala maboko na maboko na yâ oko fango lege so andu aye ti yingo, na kangbingo yâ ti akungba, nga na warango aye ti nzoni na lege ni.
Na salango mariage “gi na yâ Seigneur” mbeni Chrétien ayeke fa so lo yekia wango ti Babâ ti e ti yayu (1 aCorinthien 7:39). Ye so ayeke leke gunda ti mbeni mariage so aduti beoko, so alingbi ti ga na gonda na yango-iri na ndo Nzapa tongana ala use kue asala na lo tongana ‘tâ fon mba na yâ kusala’ na yâ mbeni lege so ayeke nde.—aPhilippien 4:3.
[Lingu ti foto na lembeti 32]
Chameau na bagara: Na yâ buku La Tierra Santa, Volume 1, 1830