Mbeni tondo so akpengba mabe na amû ngangu aTémoin ti Jéhovah na Ukraine
LEGEOKO tongana aChrétien ti kozo siècle so a sala ngangu na ala, awakua ti Nzapa nga ayeke wara mara ti ye tongaso laso (Matthieu 10:22; Jean 15:20). Mbeni ndo so salango ngangu aninga dä wala so ayeke ngangu mingi ahon ti Ukraine, ndo so a kanga lege na kusala ti fango tënë ti Royaume teti angu 52, ayeke dä pëpe.
Annuaire des Témoins de Jéhovah 2002 asala lani tondo ti awakua ti Nzapa ti kodoro ni kâ. A yeke mbeni tondo ti mabe, ti dutingo na mbito pëpe, na ti ngangu na gbele kota ye ti ngangu. Biröo ti filiale ti aTémoin ti Jéhovah ti Ukraine awara ambeni tënë ti fango bê ti kiri singila tongana ti so ge:
“Mbi hunzi ti diko Annuaire 2002 awe. Mbi kanga bê gbä ti zia ti toto na ngoi so mbi diko ye na ndo kusala ti i na Ukraine. Mbi ye ti fa na i so kpengba tapande ti wâ na ngangu mabe ti i amû ngangu na mbi mingi. A yeke mbeni ye ti yekiango ndo ti duti na yâ ti oko sewa ti yingo tongana i. Singila mingi mingi!”—Andrée, France.
“Mbeni tënë ti fa peko ti bê ti kiri singila ti mbi na mbage ti i nga na Jéhovah ndali ti Annuaire 2002 ayeke dä pëpe. Ngu ti lê asigigi na lê ti mbi tongana mbi diko aye mingi so asi na aita, so asala angu mingi na da ti kanga nga na yâ akando ti pasi. Mbito so ala yeke na ni pëpe apika bê ti mbi. Atâa so mbi yeke Témoin asala angu 27 awe, mbi lingbi lakue ti manda ye na mbage ti aita-koli na aita-wali so. Ala sala si mabe ti mbi akpengba na mbage ti Jéhovah, Babâ ti e ti yayu.”—Vera, ngbele Yougoslavie.
“A yeke na ngia na bê si mbi sû mbeti so ndali ti nzoni tapande ti gbungo ngangu na ti dutingo be-biani so i fa na yâ ti angu kue so a kanga lege na i. Ziango bê ti i kue na Jéhovah nga lekengo na bê ti i ti ngbâ be-ta-zo aga na i ye ti gonda. Salango tele ti i kete na gbele atara asala si mbi hinga na bê ti mbi biani so Jéhovah ayeke zia awakua ti lo pëpe. Ndali ti nzoni tapande ti dutingo na mbito pëpe, ti lutingo ngangu nga na ti gbungo ngangu so i zia, a lingbi ti duti ngangu mingi pëpe na e ti yeda na akete kete kpale ti e.”—Tuteirihia, Polynésie française.
“Na peko ti so mbi diko Annuaire ni, a yeke nzoni mbi sû mbeti na i. Aye ti kpengbango zo so kue asi na i andu lani bê ti mbi mingi. Mbi yeke sala baba ti duti mbeni oko ti mara ti mbeni bungbi so aduti be-biani, so aduti beoko, so mbeni Babâ ti ndoye, so ayeke mû ngangu na e na ngoi so alingbi, ayeke na li ni. Vundu asala lani mbi so akpengba wakua ti Jéhovah mingi abâ pasi ahon ndo ni na même awara kuâ. Me, mbi yeke nga na ngia so na lege ti kpengba bê nga na wâ ti ala, azo mingi amanda lani tâ tënë na aga ti hinga Babâ ti e ti ndoye.”—Colette, Pays-Bas.
“Mbi na wali ti mbi, e bâ so a lingbi e sû mbeti na i ti tene na i so tondo so e diko na yâ Annuaire na ndo Ukraine andu bê ti e lani mingi. I, aita be-ta-zo, i zia mbeni tapande ti gbungo ngangu so adö bê na gbe ti akota tara so aninga. A lingbi na atënë ti aProverbe 27:11, so tâ ye ti ngia si Jéhovah awara ti hinga so aita ti Ukraine mingi abata be-biani so ayengi lâ oko pëpe atâa asioni ye kue so Zabolo asala.”—Alan, Australie.
“Ngu ti lê ayuru na lê ti mbi tongana mbi diko ye na ndo aita ti Ukraine. Ala hon lani ndo ti aye mingi: angu mingi so ala sala na yâ ada ti kanga, salango sana, sioni komandema nga tokuango asewa na ndo nde nde. Mbi ye ti tene na aita kue so angbâ lakue ti sala kusala na yâ akongregation ti i so mbi ndoye ala, na mbi yekia ala ngangu mingi. Bê ti mbi anzere ndali ti mbito so ala yeke na ni pëpe nga lutingo ngangu ti ala. Mbi hinga so a yeke yingo ti Jéhovah si ayeke na lingu ti ngangu ti ala. Jéhovah ayeke ndulu na e na lo ye ti mû maboko na e.”—Sergei, Russie.
“Mbi diko lani Annuaire 2002 na mbi toto. Aita-wali na aita-koli ti kongregation ti e ayeke sala tënë ti i. I yeke tâ mbeni ye ti ngele ngangu. Mbi yeke na ngia ti duti na yâ ti mbeni mara kota sewa ti yingo tongaso.”—Yeunhee, Corée ti Mbongo.
“Tondo ti mabe ti i, gbungo ngangu nga kpengba ndoye ti i teti Jéhovah nga na ti Royaume ti lo andu bê ti mbi ngangu mingi. Ngoi na ngoi, e yeke girisa ti bâ na nene ni liberté so e yeke na ni, nga gbâ ti akobe ti yingo so Jéhovah amû na e. Ye oko, a yeke tongaso pëpe teti i. Tapande ti mabe ti i amû maboko na e ti bâ so tongana e yeke na nzoni songo na Nzapa ti e, fade lo yeke mû na e ngangu ti hon ndo ti mara ti atara nde nde kue.”—Paulo, Brésil.
“Mbi wara lege ti diko ye na ndo aye so asi na i na yâ Annuaire 2002. A ndu bê ti mbi mingi, mbilimbili pendere tondo ti Ita-wali Lydia Kurdas. Mbi bâ so mbeni kpengba songo abungbi mbi na ita-wali so.”—Nidia, Costa Rica.
“Mbi hunzi laso ti diko Annuaire 2002 awe. Mabe ti mbi na Jéhovah akpengba na ngoi so mbi diko ni. Mbeni ye so mbi yeke girisa ni lâ oko pëpe ayeke atënë ti kite so aluti na ndo aita-koli so ayeke mû li ni. A fa na mbi ti duti lâ oko pëpe na kite na ndo aita-koli so ayeke mû li ni. Singila mingi! Kobe ti yingo so ayeke ye ti kpengbango mabe, na ayeke leke e teti ngoi so e lingbi ti wara tara ti mabe ti e.”—Leticia, Amerika.
“E yeke na bê ti kiri singila teti pendere Annuaire ni. Ti awafango tënë mingi, kozoni ti tene ala diko ye la na ndo kusala ti aita ti e na Ukraine. A kpengba lani aita ti e ge. Mbilimbili na popo ti amaseka, ambeni mingi akono yâ ti kusala ti ala. Ambeni ato nda ti sala kusala tongana apionnier permanent wala auxiliaire. Atondo ti aita-koli na ti aita-wali so asala lani na Jéhovah na ngoi so a kanga lege na kusala na kodoro ni akpengba aita kue.”—Komite ti kusala ti mbeni kongregation, Ukraine.
Biani, dutingo be-biani ti aita ti e na Ukraine ayeke mbeni lingu ti mungo ngangu teti awakua ti Jéhovah na ndo sese mobimba. A yeke tâ tënë so ti diko lakue atondo ti mungo wâ na bê so asigigi na yâ Annuaire ngu oko oko ayeke mbeni pendere lege ti kpengba mabe ti e na gbungo ngangu ti e na yâ ti akpengba ngoi so e yeke dä.—aHébreu 12:1.