Mara ti iri wa mo yeke gi ti wara?

MO DIKO mbeni lâ awe mbeni tokua ti kuâ na yâ mbeti-sango ti kodoro so mo yeke dä wala mo bâ awe yongoro tondo na ndo fini ti mbeni zo so akui nga aye so zo ni asala? Mo yeke hunda tele ti mo: ‘Ye nyen azo alingbi ande ti tene na ndo mbi?’ Azo oke abi bê ti ala mbeni lâ awe na ndo lege so azo ayeke dabe ande na ala na peko ti kuâ ti ala? Tongaso, atâ hundango tënë ni ayeke so: Tënë wa azo ayeke tene na ndo mo laso tongana fade mo kui? Mara ti iri wa mo yeke gi ti wara? Tongana nyen mo ye si Nzapa nga na azo so ahinga mo adabe ti ala na mo?

Wasungo buku ti Bible so a hiri ni Zo-ti-fa-tene, so ayeke na ndara atene ândö: “Nzo iri ayeke nzoni ahon mafuta ti ngele ngangu; na lâ ti kui ayeke nzoni ahon lâ ti dungo zo.” (Zo-ti-fa-tene 7:1). Ngbanga ti nyen lâ ti kuâ ti mbeni zo ayeke nzoni mingi ahon lâ ti dungo lo? A yeke ngbanga ti so na ngoi so a dü mbeni zo, a de zo ni awara iri pëpe. Lo de ti sala mbeni ye pëpe. Na ye so lo sala na yâ fini ti lo ayeke mû na lo ande nzoni wala sioni iri. Ti ala so, tongana angu ayeke hon, awara mbeni nzoni iri, lâ ti kui ti ala ayeke biani nzoni mingi ahon lâ ti dungo ala.

Tongaso, e yeke na mbeni ye ti soro. Ti tene ni biani, lâ oko oko, e yeke na aye ti soro mingi so ayeke fa ande na lâ ti kuâ ti e iri so e yeke na ni, mbilimbili lege so fade Nzapa ayeke dabe ti lo na e. Na lege so, oko Hébreu zo ti ndara so asû na mbeti: “Ye so zo adabe lo dä tënë ti azo ti mbilimbili ayeke nzoye, me fade iri ti azo ti sioni afun.” (aProverbe 10:7). So tâ ye ti yekiango ndo ti tene Nzapa adabe ti lo na e ti mû na e deba nzoni!

Tongana e yeke azo ti ndara, fade ye so e zia na gbele e ti sala ayeke ti nzere na Nzapa na salango si fini ti e alingbi na akpengba-ndia ti lo. So ti tene, ti mû peko ti angangu kpengba-ndia so Christ asala tënë ni: “A lingbi mo ndoye Seigneur Nzapa ti mo na bê ti mo kue, na âme ti mo kue, na bibe ti mo kue. So ayeke kota komandema na komandema ti kozoni. Na komandema use ni so alingbi na kozo komandema ayeke so, Mo ndoye zo so ayeke ndulu na mo legeoko tongana mo ndoye mo mveni. Ndia kue na aProphète aluti na ndo komandema use so.”​—Matthieu 22:37-40.

A dabe na ambeni zo tongana azo ti mungo nginza mingi ti mû maboko na ambeni zo, azo ti gingo nzoni ti amba ti ala, azo so atiri ti tene azo kue awara droit ti ala. Ti ambeni nde, a yeke teti akusala so ala sala na yâ dengo buze, senda-ye, na lege ti kaïngo kobela wala ambeni kusala tongaso. Ye oko, mo ye ti tene azo adabe ande na mo tongana nyen?

Robert Burns (1759-1796), mbeni wasungo mbeti ti kodoro ti Écosse aye lani ti tene mbeni zo ti ngangu amû na e lege ti bâ e mveni tongana ti so ambeni zo ayeke bâ na e. Mo lingbi ti bâ tele ti mo mveni na nzoni lê na ti tene so mo yeke na nzoni iri na gbele azo nga na gbele Nzapa? Na nda ni, songo ti e na amba ti e ayeke biani kota ye mingi ahon aye nde nde so e sala, teti kete ngoi, na yâ ye ti wanguru wala dengo buze. Ni la, hundango tënë ni ayeke so: Tongana nyen lege so e yeke sala na ye na mbage ti ambeni zo, lisoro ti e, dutingo ti e, salango ye ti tele ti e andu ala? Ala yeke bâ e tongana azo so ayeke ga ndulu na amba ti ala wala azo so aye ti duti na amba ti ala pëpe, azo ti nzobe wala azo ti nzobe pëpe, azo so awoko yâ ti salango ye ti ala wala pëpe, azo ti salango songo nga azo ti be-nzoni wala azo so adë dengo nga azo so aye ti pusu ndulu na amba ti ala pëpe, mbeni zo ti kasango ndo ngangu wala mbeni wamungo wango so alingbi ti mû maboko na zo? Zia e bâ ye so e lingbi ti manda na lege ti atapande ti giriri nga na ti ngoi ti e.

[Foto na lembeti 3]

Robert Burns aye lani ti tene mbeni zo ti ngangu amû na e lege ti bâ e mveni tongana ti so ambeni zo ayeke bâ na e

[Lingu ti foto ni]

Ti buku A History of England