“Azo use apika yanga-da ti e”

“A SALA angu use awe, e wara kota vundu teti kete molenge ti e ti wali agirisa fini ti lo.” So ayeke akozo tënë ti mbeni mbeti so alingbi ti diko ni na yâ mbeti-sango Le Progrès, so asigigi na gbata ti Saint-Étienne na kodoro ti France.

“Mélissa ayeke lani na nze ota na lo bâ pasi mingi na lege ti mbeni sioni kobela so a hiri ni trisomie 18. Tongana mbeni kota ye ti vundu tongaso asi na mo, na mo bâ so a yeke na lege ni pëpe, kä so ayeke na bê ti mo ayeke hunzi biani lâ oko pëpe. Atâa so a bata e lani na yâ vorongo ti aCatholique, ye so agbu lakue bê ti e mingi ayeke lani tënë so: ‘Nzapa, tongana mo yeke dä biani, ngbanga ti nyen mo zia lege si aye tongaso asi?’ ” A yeke polele so mama so asû lani mbeti so abâ so lo yeke na yâ ti kpale na lo lingbi ti sala ye oko pëpe. Mbeti ti lo angbâ ti gue:

“Ngoi kete na peko ti aye so, azo use apika yanga-da ti e. Fade fade, mbi hinga so ala yeke aTémoin ti Jéhovah. Mbi yeke ndulu ti hunda na ala yeke ti sigigi, me na pekoni, mbi bâ mbeni brochure so ala yeke kangbi ni. Brochure ni asala tënë na ndo ngbanga ti nyen Nzapa azia lege na pasi. Tongaso, mbi zia lege na ala ti lï na yâ ti da ni na bibe ti fa na ala so atënë so ala yeke tene ayeke na lege ni oko pëpe. Mbi bâ ti mbi so tongana a ndu tënë ti pasi, sewa ti mbi awara ni ahon ndo ni biani, na e mä nga mingi atënë so a fa pekoni gi senge senge tongana ‘Nzapa amû lo na e, na Nzapa la akiri akamata lo.’ A-Témoin ni aduti na mbi teti ndulu na ngbonga oko. Ala mä lani mbi na bê so asi na be-nzoni, na tongana ala ye ti gue, tele ti mbi ayapu mingi ahon ti kozo na mbi yeda ti tene ala sala mbeni vizite na mbi. Ye so a sala fadeso angu use awe. Mbi ga oko ti aTémoin ti Jéhovah pëpe, me ala yeke manda Bible na mbi, na mbi yeke gue fani mingi na abungbi ti ala tongana lege azi na mbi.”