Ndoye ayeke kota ye mingi

ATÂA ngu ti ala, kodoro ti ala, yanga ti kodoro wala mara ti ala, azo kue ayeke na mbeni kota nzara ti tene a ndoye ala. Tongana a kaï nzara ni so pëpe, ala yeke na ngia pëpe. Mbeni wagingo ye na ndo lege ti kaïngo kobela asû na mbeti: “Ndoye na salango songo ayeke na gunda ti ye so asala si e tï kobela na ye so asala si e duti na nzoni seni, ye so asala si e duti na vundu na ye so aga na e ngia, ye so asala si e hu pono na ye so asala si e duti nzoni. Tongana mbeni fini yorö ayeke sala ngangu tongaso na ndo zo, ka adocteur kue na yâ akodoro alingbi ti mû ni na azo ti kobela so aga ti bâ ala. Tongana a mû ni pëpe, andâ adocteur ni asala kusala ti ala na lege ni pëpe.”

Ye oko, sese ti laso, mbilimbili azo ti kangbingo asango nga na azo mingi so azo amû ala tongana atapande, fani mingi, ala yeke gboto lê na ndo mosoro, ngangu ti komande, warango kota iri nga na ndo bungbingo ti koli na wali ahon ti gboto lê na ndo nzara ti wara mbeni songo ti ndoye so anzere. Awafango mbeti mingi agboto lê na ndo aye ti mitele so zo alingbi ti zia na gbele lo nga na akua, na hakango nzoni maïngo ti mbeni zo gi na ye so zo ni asala. Tâ tënë, ti manda mbeti na ti maï akode so adü zo na ni ayeke kota ye mingi, ye oko, a lingbi zo ni abi tele ti lo kue gi na ndo aye so na tongaso lo wara ngoi pëpe teti sewa na akamarade ti lo? A sala angu 2000 tongaso awe, mbeni wasungo mbeti ti giriri so ahinga ndo mingi na so ayeke gbu li ti lo lani na ndo salango ye ti azo, ahaka mbeni zo so ayeke na akode nde nde me na ndoye pëpe na mbeni ‘gbagba ngo wala mbeni wen so ayeke toto mingi.’ (1 aCorinthien 13:1, Fini Mbuki, 2001). Mara ti azo tongaso alingbi ti ga azo ti mosoro na même iri ti ala alingbi ti wu. Ye oko, ala lingbi lâ oko pëpe ti duti na tâ ngia.

Jésus Christ so ayeke na nzoni gbungo nda ti ye na kota ndoye teti azo, azia ndoye ti Nzapa nga na ti azo so ayeke ndulu na lo tongana kota li ti tënë ti fango ye ti lo. Lo tene: “A lingbi mo ndoye Seigneur Nzapa ti mo na bê ti mo kue, na âme ti mo kue, na bibe ti mo kue. . . . Mo ndoye zo so ayeke ndulu na mo legeoko tongana mo ndoye mo mveni.” (Matthieu 22:37-39). A yeke gi ala so amû lani peko ti atënë so si alingbi biani ti duti adisciple ti Jésus. Tongaso, lo tene: “Na lege so, fade azo kue ahinga i yeke adisciple ti Mbi, tongana i ndoye tele ti i na popo ti i.”​—Jean 13:35.

Ye oko, tongana nyen mbeni zo ayeke lë ndoye na yâ sese ti laso? Nga tongana nyen ababâ na mama alingbi ti fa lege ti ndoye na amolenge ti ala? Fade article ti peko ayeke sala lisoro na ndo ahundango tënë so.

[Afoto na lembeti 3]

Ti lë ndoye na yâ ti mbeni sese so kota bê ti warango ye asi singo dä ayeke mbeni kpale