‘Salomon ayü bongo ti pendere alingbi na oko ti ala pëpe’
A YEKE bâ ka mara ti akongö ti ngonda tongana ti so ge na tele ti alege ti kodoro ti Afrika ti mbongo. A hiri ala cosmos, na ala londo na mbage ti kodoro ti Amerika so ndowa ayeke dä. Mara ti apendere kongö tongaso a lingbi ti dabe e na mbeni ye ti manda so Jésus afa ni ândö. Azo mingi so amä lo ayeke lani awanzinga, na ala yeke gi bê ti ala na ndo aye ti mitele so atia ala tongana kobe na bongo.
Na ndo tënë ti bongo, Jésus ahunda tënë so: “Teti nyen i gi bê ti i teti bongo? I bâ langa ti ngonda, i bâ lege so ala maï. Ala sala kusala pëpe, ala tina pëpe; me Mbi tene na i, même Salomon, na yâ gloire ti lo kue, ayü bongo ti pendere alingbi na oko ti ala pëpe.”—Matthieu 6:28, 29.
Azo ayeke na atënë nde nde na ndo mbilimbili mara ti kongö wa Jésus asala tënë ni. Ye oko, Jésus ague ti haka ni na pele so zo kue ahinga ni, lo tene: ‘Me tongana Nzapa amû bongo ti pendere tongaso na pele ti ngonda, so ayeke laso, na kekereke a bi na four, fade Lo ye mingi ahon ti yû i na bongo pëpe i azo ti kete mabe?’—Matthieu 6:30.
Atâa so a lingbi pëpe ti wara cosmos na sese ti Israël, akongö so amû ngangu biani na ye so Jésus afa. Akongö ni ayeke pendere mingi, même tongana mo bâ ni yongoro wala mo ga ndulu na tele ni, na a yeke ye so agbu bê ti azo ti mungo foto nga awakode mingi. Ti tâ tënë ni, Jésus asala lani tënë ahon ndo ni pëpe tongana lo tene, “même Salomon, na yâ gloire ti lo kue, ayü bongo ti pendere alingbi na oko ti ala pëpe.”
Ye nyen e lingbi ti manda laso? E lingbi ti manda so ala so ayeke sala na Nzapa alingbi ti hinga biani so fade lo yeke mû maboko na ala ti wara aye so atia ala atâa na yâ ngoi ti akpale. Jésus atene: “I gi royaume ti Nzapa, na fade A mû ye so [tongana kobe na bongo so atia zo ni] na i nga.” (Luc 12:31). Biani, warango atâ ye ti nzoni ayeke ga na lege ti gingo Royaume ti Nzapa. Ye oko, mo hinga ye so Royaume ti Nzapa aye ti tene nga ye so lo yeke sala ande teti azo? A-Témoin ti Jéhovah ayeke duti ande na kota ngia ti mû maboko na mo ti wara akiringo tënë ti Bible na ndo ni.