Mbeti ti tondo so agbu bê

RICHARD E. BYRD, mbeni wagingo nda ti ye asala lani atambela ti agingo nda ti ye fani oku na sese ti Antarctique, a londo na ngu 1928 ti si na ngu 1956. Na batango mbeni mbeti so ayeke tâ na lege ni, lo na amba ti lo alingbi lani ti fa tambelango ti pupu, ti leke acarte, na ti wara asango mingi na ndo sese ti Antarctique.

Atambela ti Pakara Byrd afa nene ti bata mbeni mbeti ti sungo tondo na yâ ni. Na yâ mbeni mbeti ti sungo tondo, a yeke bungbi anzene nzene ye so asi na ngoi ti tambela so mbeni zo asala. Na pekoni a lingbi ti sala kusala na sango so ti kiri ti bâ ye nyen asi na ngoi ni so wala ti gi nda ti sango so alingbi ti mû maboko teti ambeni tambela ti peko.

Mbeti ti Nzapa amû mbeni tondo so agbu bê na ndo Kota Moa ti ngoi ti Noé. Kota Moa so amû sese mobimba aninga lani ahon ngu oko. Ti leke tele teti Kota Moa ni, Noé, wali ti lo, amolenge ti ala ti koli ota na awali ti ala amû angu 50 wala 60 ti leke arche, mbeni kota ye so akpa sanduku so yâ ni akono mingi, so alingbi ti mû na yâ ni litre ti ngu kutu bale-osio. Ngbanga ti nyen a leke arche ni? A yeke ti bata ambeni zo nga na anyama na fini na ngoi ti Kota Moa ni.​—Genèse 7:1-3.

Biani, a yeke wara na yâ Bible na buku ti Genèse ye so alingbi ti hiri ni mbeti ti tondo ti Noé na ndo ye so asi a londo na tongo nda ti Kota Moa ti si na ngoi so lo na sewa ti lo asigigi na yâ arche ni. A yeke wara na yâ ni mbeni ye so ayeke na nene ni mingi teti e na ngoi ti laso?