Atënë so azo ahunda

Tongana mbeni Chrétien amä ambeni go kirikiri me lo bâ zo oko pëpe, a ye lakue ti tene so ayingo sioni ayeke sala ngangu na ndo lo?

Oko pëpe. Tâ tënë, ambeni zo ayeke tene so ayingo sioni ayeke fa tele ti ala na lege so. Ye oko, ti mingi ti azo so amä ambeni go ti azo kirikiri, wala so ayeke bâ ambeni ye ti ndima so a yeke ngangu ti fa pekoni, tongana ala gi ti hinga nda ni nzoni, ala bâ so ala yeke gi na mbeni kpale ti seni.

Même na kozo siècle, azo ahinga so ngoi na ngoi, akpale so ayingo sioni ayeke ga na ni nga na akpale so aga na lege ti kobela ti mitele akpa tele mingi. Matthieu 17:14-18 asala tënë ti mbeni pendere-koli so Jésus asava lo. Atâa so salango ye ti tele ti molenge-koli so ayeke tongana ti zo so ayeke na kobela ti makako, a yeke mbeni yingo sioni si ayeke tâ na gunda ti pasi ti lo. Ye oko, na yâ mbeni ye so asi kozoni, tongana a ga na Jésus azo mingi so ayeke na kobela, ti tene lo sava ala, a wara na popo ti ala ‘ambeni zo so ayeke na ayingo sioni, na ambeni zo ti gbalo [“ala so ayeke na kobela ti makako”, Fini Mbuki, 1995]’. (Matthieu 4:24). Biani, a hinga lani so ambeni zo so ayeke na kobela ti makako ayeke pëpe na ayingo sioni. Akpale ti ala alondo gi na kobela ti mitele senge.

A tene so ambeni zo so ayeke na kobela ti li so a hiri ni schizophrénie, so fani mingi a yeke sava ni na ayorö ti hôpital, ayeke mä ka ambeni go kirikiri wala ayeke bâ ambeni ye ti ndima so, na bango ni, a lingbi ti duti ngangu ti fa pekoni.a Ambeni kpale ti mitele alingbi nga ti duti na gunda ti kpale ti bibe so a sala zo kirikiri na so zo alingbi ti pensé na lege ni pëpe so a yeke ayingo sioni si ayeke na gunda ni. Tongaso, mbeni zo alingbi ti tene so ni yeke mä ago ti azo me ni yeke bâ azo ni pëpe, wala ti tene so ambeni ye ti ndima ayeke si na ni. Atâa lo lingbi pëpe ti ke biani so a yeke ayingo sioni si ayeke sala ngangu na lo, a lingbi a wa lo na nda ni ti bâ wala mbeni kpale ti mitele ayeke na gunda ni pëpe.

[Kete tënë na gbe ni]