Na lege wa nzobe ayeke kota ye?
BIBLE atene: “A yeke nzobe ti zo so asala si azo aye lo”. (aProverbe 19:22). Biani, tongana ndoye ayeke na gunda ti aye so a sala na nzobe, kite ayeke dä pëpe so a yeke nzere na lê ti azo. Ye oko, na yâ Bible, tënë “nzobe” aluti na ndo songo so peut-être aleke ni kozoni awe na popo ti ambeni zo, na tapande, songo so gunda ni ayeke na ndo mbeni kusala ti nzobe so mbeni zo asala lani na mba ti lo. Tongaso a ndu nga bibe ti ndoye so ayeke be-biani.
Joas, gbia ti Juda amaï giriri pëpe pendere lengo so. Lo yeke na mbeni kota kuda ti kiringo singila na mbage ti omba ti lo nga na ti koya ti lo Jehojada. Na ngoi so ade lo wara ngu oko pëpe, âta ti lo ti wali so ayeke lani sioni mingi, asala tele ti lo mveni gbia. Lo fâ aita ti koli kue ti Joas so ayeke lani ahéritier ti mbata ti gbia ni. Ye oko, lo wara lege pëpe ti fâ kete Joas teti so omba ti lo na koya ti lo ahonde lo ngangu mingi. Ala fa nga na Joas Ndia ti Nzapa. Tongana Joas awara ngu mbasambala awe, koya ti lo asala kusala na ngangu ti lo ti kota prêtre ti fâ sioni gbia-wali ni, na ti zia Joas na ndo mbata ti gbia.—2 Chronique 22:10–23:15.
Maseka Joas akomande ândö tongana gbia na mbeni lege so ayeke nzoni mingi juska na ngoi so koya ti lo akui. Ye oko, na pekoni, lo to nda ti voro ayanda. Nzapa atokua lani Zacharie so ayeke molenge ti Jehojada ti gboto mê ti Joas ndali ti kengo tënë ti mabe ti lo. Joas amû yanga ti bo Zacharie na tênë juska lo kui. So tâ ye ti songo bê, mara ti salango ye na be-biani pëpe na mbage ti mbeni sewa so lo yeke na kuda mingi na mbage ti lo!—2 Chronique 24:17-21.
Bible atene: “Gbia Joas adabe lo pëpe na be-nzoni so Jehojada babâ ti Zacharie asala na lo, me lo fâ molenge ti lo.” Na ngoi so lo ga ti kui, Zacharie atene: “L’Eternel abâ ye so, na fade Lo futa kula ni!” Atënë ti Zacharie aga tâ tënë. Joas awara lani ngangu kobela na azo ti kua ti lo mveni afâ lo.—2 Chronique 24:17-25.
Nde na tapande ti Gbia Joas, azo kue so ayeke mû peko ti wango so, fade ala yeke wara pendere ye ti nzoni teti kekereke: “Zia nzobe na tene-biani azia mo pëpe. . . . Tongaso fade mo wara tënë nzoni na . . . lê ti Nzapa na ti azo nga.”—aProverbe 3:3, 4.