Atënë so azo ahunda

Tongana mbeni Chrétien so a sa yingo na ndo ti lo na so kobela awoko lo abâ so lo lingbi oko pëpe ti ga na matanga ti Kobe ti Seigneur, a lingbi ti sala mbeni ye teti lo?

Biani, a lingbi ti sala mbeni ye na a hunda ti sala ni teti mbeni Chrétien so a sa yingo na ndo ti lo, so awoko na kobela na so peut-être ayeke gi na gbogbo na tongaso lege ayeke dä pëpe teti lo ti bungbi oko na kongregation ti sala matanga ti Dango bê na kui ti Christ. Tongana a si tongaso, bungbi ti a-ancien alingbi ti leke ti tene mbeni ancien wala mbeni ita-koli Chrétien nde so ayeke biazo ague na mapa na vin na ita so gi na bï ni so, kozoni si lâ alondo.

Tongana lege ayeke dä, ancien wala ita-koli ni so aga alingbi ti sala ambeni ndulu tënë na ti diko ambeni versê ti Bible so alingbi na ni. Lo lingbi ti haka peko ti tapande so Jésus azia tongana Lo yeke zia lani na sese matanga ti Kobe ti Seigneur. Na tapande, a lingbi ti diko Matthieu 26:26; na peko ti sambela, a lingbi ti hon na mapa ni so mama ni ayeke dä pëpe. Na pekoni, ita ni so aga alingbi ti diko Matthieu chapitre 26, versê 27 na 28, ti sambela ti fani use ni, na ti hon na vin ni na peko. A lingbi ti tene ndulu tënë na ndo ye so mapa na vin so aduti fä ni; na nda ni, a yeke duti nzoni ti hunzi na mbeni sambela.

Tâ tënë, a lingbi zo kue asala ngangu ti duti dä na matanga ti Kobe ti Seigneur legeoko na kongregation. Me tongana mbeni ye ti ngangu asi, na tapande tongana tele ti mbeni Chrétien so a sa yingo na ndo ti lo aso ngangu, wala a gbanzi lo na hôpital wala mbeni ye nde akanga lege na lo ti sala Mémorial na peko ti lindango ti lâ na lango 14 ti Nisan, ye wa a lingbi ti sala? Mara ti Chrétien tongaso alingbi ti bâ tapande so ayeke na yâ Ndia ti Moïse na ti sala matanga ni gi lo oko alango 30 na pekoni.​—Nombre 9:9-14.