“Mbi wara ye kue so alingbi na mbi”

MBENI tondo so alondo na Bungbi ti ONU, so abâ tënë ti seni ti dunia kue, atene so laso, na ndo sese mobimba, kobela so asala si bê ti zo anze kue, na nzara ti gigi asigigi na yâ ti lo ayeke sala azo ahon kutu 120. Ngu oko oko, azo kutu oko ayeke fâ tele ti ala, nga azo, a londo na kutu 10 ti si na kutu 20 ayeke tara ti hunzi fini ti ala. Maboko wa alingbi ti mû na azo so ayeke na kobela tongaso? Ayorö alingbi ti dë songo ni kete, tongana mbeni zo amû nga maboko, a yeke kota ye mingi. Na ndo ni, ambeni zo so ayeke na kobela ni so awara mungo maboko nga na lege ti ambeti ti aTémoin ti Jéhovah, so aluti na ndo Bible, tongana ti so mbeti so alondo na France afa ni ge.

“Na yâ ti angoi so ahon ade ti ninga pëpe, mbi bâ pëpe ye so alingbi ti pusu mbi ti ngbâ na fini. Mbi sambela Nzapa ti tene lo zia si mbi kui. Nzara ti gigi asigigi na yâ ti mbi. Teti mbi ye si a mû maboko na mbi, mbi sambela Jéhovah ngangu. Mbi gi ti diko nga Annuaire des Témoins de Jéhovah 2000 na mbi hunzi ni na yâ ti alango ota. Biani, a mû maboko na mbi mingi na a kpengba mabe ti mbi.

“Mbi gi ti hinga ambeni ye na ndo ni na yâ Tour ti Ba Ndo na Réveillez-vous!, na ye so mbi diko dä adö bê ti mbi mingi! A sala angu ahon 15 awe si mbi yeke diko ambeti so lakue, me lâ oko pëpe mbi bâ tongana nyen a-article so amû ngangu na bê na agbu bê tongaso. Ambeti ni asi singo na ndoye, ye so a yeke ngangu ti wara ni laso. Mbi wara ye kue so alingbi na mbi.”

Bible atene: “L’Eternel ayeke ndulu na azo so bê ti ala afâ awe, na lo sö ala so yingo ti ala ayeke na vundu.” (Psaume 34:19). Biani, azo kue so “bê ti ala afâ awe” wala “so yingo ti ala yeke na vundu” alingbi ti wara mungo maboko nga na beku teti ngoi so ayeke ga na yâ Bible. A-Témoin ti Jéhovah ayeke kangbi ambeti so aluti na ndo Bible ti mû maboko na azo so ayeke na yâ ti bezoin si ala lingbi wara dengo bê so alondo na Nzapa.