Ndali ti Atémoin ti Jéhovah so a fâ ala

NA lango 7 ti nze ti mars 2002, na yâ gbata ti Körmend, na do ti Hongrie, a sala matanga ti fango dandara mbeni wen so a sû ambeni tënë na ndo ni. Atënë ni ayeke ti dabe na aTémoin ti Jéhovah ota so azo ti Hitler afâ ala na ngu 1945.

A kanga wen ni na tele ti da so laso ayeke ndokua so abâ tënë ti mingongo wâ na Hunyadi Road, ndo so a fâ ala dä na lê ti azo kue. A sala ni ndali ti ‘aChrétien so a fâ ala na mars 1945, ngbanga ti so yingo-ti-hinga ti ala agbanzi ala ti tiri bira. Antal Hőnisch (1911-1945), Bertalan Szabó (1921-1945), János Zsondor (1923-1945), 2002, aTémoin ti Jéhovah.’

A fâ ala gi nze use kozoni si Use Bira so Amû Sese Kue ahunzi. Ngbanga ti nyen si a fâ lani aChrétien so? Mbeti-sango ti kodoro ti Hongrie Vas Népe afa nda ni tongaso: “Na peko ti so Hitler alë gbia na Zamani, a sala sioni mingi na aJuif. Me a yeke lani gi ala oko pëpe. Tongana aTémoin ti Jéhovah, so ayeke lani be-ta-zo, ake ti bele tënë ti mabe ti ala, a sala nga sana na ala. A tokua ala na kando ti pasi nga a fâ ala. . . . Na mars 1945, a yeke zia kota mbito na bê ti azo so ayeke na mbage ti do ti Hongrie. . . . Mbeni ye so azia mbito na bê ti azo ni ayeke so a yeke tomba aTémoin ti Jéhovah na kodoro ni nga a yeke fâ ala.”

A sala matanga ni na ando use. A sala kozoni na da ti théâtre ti Batthyány Castle. Azo so amû li ni dä aduti Pakara Szabolcs Szita, mokonzi ti kota ndokua na Budapest so abata ambeti so asala tënë ti fango azo na gbe ti Hitler; László Donáth, mbeni oko ti bungbi ti bada-halezo, so abâ atënë ti droit ti azo, ti akete bungbi ti azo nga na ti avorongo; nga na Kálmán Komjáthy, zo so a fâ lani aTémoin ti Jéhovah ni na lê ti lo. Lo yeke fadeso wafango mbaï ti kodoro ni. Na pekoni azo, so li ti ala ahon 500, atambela na yâ ti gbata ni kue ti gue na use ndo so Mokonzi-gbata ti Körmend, József Honfi, ayeke fa ande wen ni dandara.

Na yâ ndangba mbeti so lo tokua kozoni si lo kui, Ján Žondor (János Zsondor) ahunda na ngangu na aita ti lo ti koli na ti wali ti yingo ti sala vundu pëpe. Lo tene: “Mbi bata lakue na li ti mbi tënë so Jean atene na yâ buku ti Apocalypse 2:10, so atene: ‘Duti be-ta-zo juska na kui’. I tene na azo ti mbi ti toto pëpe, teti mbi kui tongana mbeni zo ti sioni pëpe, me ndali ti tâ tënë.”

[Foto na lembeti 32]

Bertalan Szabó

[Foto na lembeti 32]

Antal Hőnisch

[Foto na lembeti 32]

Ján Žondor