Lo duti na be-nze-pepe na lo wara futa ni

Azo mingi ti bê ti mbilimbili aye si azo so ala ndoye ala amanda ye na ndo aye so Nzapa aleke ti sala, na tongaso awara ngia na pekoni na yâ fini ti ala. Tongana mbeni zo amû tele ti lo na Nzapa, ambeni zo nde so ayeke amaseka nga na ambakoro amû maboko peut-être na lo na lege ti nzoni tambela ti ala, ti mû desizion so na lege ti ndara. A yeke ye so asi na Jearim, mbeni maseka-wali ti Mexique, so asala kete mbeti so na aita so amû li ni na mbeni kota bungbi ti lango oko ti aTémoin ti Jéhovah; lo tene:

“Mbi ye ti kangbi na ala ngia ti mbi nga na nzerengo tele so mbi wara. Zia mbi tene na ala ngbanga ti nyen. A sala fadeso angu 18 awe, na ngoi so a de lani ti dü mbi pëpe, babâ na mama ti mbi amanda tâ tënë. Mama ti mbi ague na li ni na lege ti yingo; na pekoni, mbi na ngambe ti mbi e gue na li ni nga na lege ti yingo. E sambela lani legeoko Jéhovah ti tene mbeni lâ babâ ti mbi nga amû lege ti fini. Angu 18 ahon na pekoni awe, na lango ti laso ayeke mbeni lango so ayeke nde mingi teti e. Babâ ti mbi ayeke wara batême. Mbi kiri singila na Jéhovah teti so lo hunzi pëpe aye ti sese so kozoni si kota lango so e ku ni kungo teti angoi mingi, asi. Merci na mo, Jéhovah!”

Teti angu mingi, kite ayeke pëpe so sewa ti molenge-wali so asala lani kue ti bata na li akpengba-ndia so a wara na yâ wango ti 1 Pierre 3:1, 2 so a sû na gbe ti yingo, na so atene: “Legeoko tongaso, i awali, i mä akoli ti i mveni, si tongana ambeni koli ake ti mä Tënë ni, a lingbi wara ala teti Nzapa na lege ti tënë pëpe, me na lege ti tambela ti awali ti ala, tongana ala bâ lege so i bata tele ti i na mbito.” Nga, e hinga biani so maseka Jearim asala ye lani alingbi na atënë ti Deutéronome 5:16: “Yekia babâ na mama ti mo, legeoko tongana L’Eternel Nzapa ti mo akomande mo”. Batango mara ti akpengba-ndia tongaso, nga kungo Jéhovah na be-nze-pepe aga biani na adeba nzoni mingi na Jearim nga na sewa ti lo.