Angangu so amaï anzoni salango ye

Na hunzingo ti ngu 2001, azo so amä Dasinga ti Mozambique amä tokua so:

“Gbia ti kodoro ague a bâ yâ ti filiale ti aTémoin ti Jéhovah na Maputo. Lo wa aTémoin ti Jéhovah ni ti kono ngangu so ala yeke sala ti maï nzoni salango ye na popo ti asewa na ti fa ye na akota zo na lege ti kapa ti ala ti manda ti diko na ti sû mbeti. Na lege ti kapa so, azo ndulu na 10 000 ahinga awe ti diko na ti sû mbeti. Gbia ti kodoro, Chissano, atene so a lingbi a gonda mara ti akapa tongaso, teti so ala yeke mbeni ye so amû maboko mingi na azo ti leke akpale ti fango mbeti so kodoro ni angbâ lakue ti wara.”

Na pekoni tokua ni afa kete mbage ti tënë so gbia ti kodoro ni atene lani: “A nzere na e mingi ti bâ so azo mingi asala nzara ti leke kpale ti dikongo na ti sungo mbeti. A fa na e so asenge zo ayeke mû ande maboko na e ti sala si wungo ti azo so ahinga ti diko mbeti ague na li ni. Ni la, mbi ye gi ti wa aTémoin ti Jéhovah ti kono yâ ti akapa ti ala ti fango na azo ti diko na ti sû mbeti, atâa a yeke na yanga wa. Kota ye ni ayeke ti tene azo ahinga ti diko na ti sû mbeti, si ala lingbi ti duti na kpale pëpe ti sala lisoro na popo ti ala nga si, na yâ angoi so ayeke ga, ala mû mbage ti ala mingi na yâ mandango nga na fango mbeti.”

A-Témoin ti Jéhovah na Mozambique ayeke sala a-ekole ti manda ti diko na ti sû mbeti na ando 850 na yâ kodoro ni kue, si na lege ni azo alingbi ti diko Mbeti ti Nzapa ndali ti ala mveni. Nga, yenga oko oko ala yeke manda Bible senge senge na azo 50 000 tongaso na da ti ala. Aye so kue ayeke mbage ti kapa ti fango Mbeti ti Nzapa so a yeke sala fadeso na yâ ti akodoro 235 (Matthieu 24:14). Mo nga mo lingbi ti wara nzoni na lege ti kapa so. Tongaso, mo gue mo bâ aTémoin ti Jéhovah ti vaka ti mo.