“Duti na ndara na nda ti fini ti mo”

Jean de La Bruyère, mbeni wasungo-mbeti ti siècle 17, so ayeke mbeni Français, atene: “Mingi ti azo ayeke mû lâ ti pendere ti ala ti sala si lâ ti mbakoro ti ala aga sioni.” Biani, mbeni maseka so ayeke zo ti bê use alingbi ti hinga mbilimbili pëpe ye so lo lingbi ti sala, na nda ni, lo yeke na vundu na bê ti lo ayeke so lo. Na mbeni mbage nde, maseka so li ti lo akpengba mingi alingbi peut-être ti ngbâ ti sala mbeni ye so ayeke na lege ni pëpe, na a sala si tongana lo ga mbakoro bê ti lo ayeke duti na ngia oko pëpe. Atâa zo agirisa ti sala mbeni ye so ayeke na lege ni wala lo sala mbeni ye ti sioni, aye so use kue alingbi ti ga na kota vundu na lo.

Tongana nyen zo alingbi ti kpe mara ti ye tongaso? Na yâ gbotongo mê so lo mû na ndo salango ye na bê use ti amaseka, Mbeti ti Nzapa awa ala: “Fadeso, mo dabe mo na Lo so acréé mo, na lâ ti pendere ti mo, kozoni si lâ ti sioni aga, na ngu ni asi, so fade mo tene, Mbi wara ngia na yâ ala pëpe”. (Zo-ti-fa-tene 12:3). Tongana mo yeke mbeni maseka, sala ambeni ye so ayeke mû ande lege na mo ti manda ye na ndo “Lo so acréé mo” na ngoi so mo de pendere.

Tongaso, tongana nyen Bible amû maboko na amaseka ti kpe ti sala ye kirikiri na lâ ti pendere ti ala? Lo tene: “Mo mä wango, na mo mä wango-tene, si mo lingbi duti na ndara na nda ti fini ti mo.” (aProverbe 19:20). Bible afa nga polele so tongana mbeni zo, atâa lo yeke maseka wala mbakoro, ake ndara so alondo na Nzapa ngbanga ti so lo bâ ye na nene ni pëpe wala lo sala kpengba-li, lo yeke wara ye ti sioni mingi na pekoni (aProverbe 13:18). Nde na so, salango ye alingbi na fango lege ti Nzapa asala si zo awara “lâ mingi, na fini teti ngu mingi, na siriri,” so ti tene mbeni fini so anzere.​—aProverbe 3:2.