Ala kue akui
“Ngu so alï ahon na ndo ti ala, ala linda na gbe ti ngu tongana tênë.”
A YEKE na lege ti atënë so si Moïse na azo ti Israël ahe bia ti sepela lege so a zi na ala na yâ Ngu Bengba, na a futi na awato ti ala ti Égypte so atomba peko ti ala, so ti tene Pharaon na aturugu ti lo.—Exode 15:4, 5.
Ti ala kue so abâ lani na lê ti ala kpengba ye so asi, mbeni ye ti manda ayeke dä. A yeke so wa? Zo kue so adë kite wala ake ngangu ti komande ti Jéhovah alingbi pëpe ti ngbâ na fini. Atâa so kue, gi anze kete na pekoni, ambeni kota zo na popo ti azo ti Israël, so ti tene Koré, Dathan, Abiram, nga na ambeni zo 250 so amû peko ti ala, alondo polele ti ke ngangu ti komande so Nzapa amû na Moïse nga na Aaron.—Nombre 16:1-3.
Jéhovah amû yanga na Moïse ti tene na azo ti Israël ti hon yongoro na atente ti azo ti kpengba-li so. Dathan na Abiram, nga na azo ti da ti ala, ake ti gbian bango ndo ti ala. Tongaso, Moïse atene na ala so fade Jéhovah mveni ayeke fa na azo ti Lo, so akoli so “ake L’Eternel.” Tongaso, Jéhovah asuru sese ni na gbe ti ala. “Azo so na azo ti ala kue azu na ndo-ti-awakinda tongana ala de na fini, na sese ni akanga na ndo ala”. Ka ti Koré na ambeni zo ni so ake yanga ayeke lani tongana nyen? “Wâ alondo na L’Eternel, a gbi azo ngbangbo use na ndo ni bale-oku so amû offrande ti yombo.”—Nombre 16:23-35; 26:10.
Pharaon na aturugu ti lo, nga azo so ake yanga na yando, ala kue akui ngbanga ti so ala ke ti yeda na ngangu ti komande ti Jéhovah, nga na lege so lo yeke sala kusala na azo ti lo. Ni la, a yeke tâ kota ye mingi ti tene ala kue so aye ti tene Jéhovah abata ala na yâ ngoi ti ngangu so, agi hio ti manda ye na ndo Jéhovah, na ti mä yanga ti lo tongana “Lo Ti Nduzu Ahon Kue” na “Lo Ti Ngangu Ahon Kue.” Na salango tongaso, ala lingbi ti wara dengo bê na lege ti atënë so: “Fade azo saki oko atï na tele ti mo, na azo saki bale-oko atï na koti ti mo; me fade a ga ndulu na mo pëpe. Fade mo bâ futa ti awasiokpari, fade mo bâ gi na lê ti mo. Teti Mo, O L’Eternel, Mo yeke Ndo Ti Bata Tele ti mbi. Mo sala si Lo Ti Nduzu Ahon Kue aga ndo ti duti ti mo”.—Psaume 91:1, 7-9.