Gango Mbakoro Akanga Lege Pëpe ti Manda Ye
A DÜ Kseniya na ngu 1897. Lo yeke na amolenge-wali ota, molenge-koli oko, atarä 15 so adü amolenge 25. Na yâ fini ti lo kue, lo sala ye so ababâ na mama ti lo afa na lo ti sala. Lo kpe lani kodoro-sese ti Abkhaz, so ayeke na popo ti Ngu Vuko na Caucase, na so bira akangbi yâ ni, na lo gue na Moscou. Atâa so kue lo duti na ngia na fini ti lo, mbilimbili teti lege ti vorongo so akotara ti lo amû ni na lo.
Na ngu 1993, molenge ti Kseniya ti wali, Meri, aga mbeni oko ti aTémoin ti Jéhovah. Meri ato nda ti fa na Kseniya tënë na ndo Jéhovah Nzapa nga na ndo Bible, me lo ye lani dä pëpe. Kseniya angbâ lakue ti tene na molenge ti lo ti wali: “Mbi lingbi pëpe ti manda fini ye teti ngu ti mbi aga mingi awe.”
Ye oko, Meri, molenge ti lo ti wali; Londa, wali ti tarä ti lo ti koli; nga na Nana na Zaza, amolenge-wali so atarä ti lo adü, ala kue aga aTémoin ti Jéhovah na ala ngbâ lakue ti sala lisoro na lo na ndo Bible. Na mbeni bï ti ngu 1999, ala diko mbeni versê na Kseniya so andu bê ti lo. Na yâ versê ni, a wara akpengba-tene so Jésus amû na abazengele be-ta-zo ti lo tongana lo zia na sese Kobe ti Seigneur. (Luc 22:19, 20) Na bï ni so, na ngu 102, Kseniya amû desizion ti manda Bible.
Kseniya atene: “Na peko ti dutingo na fini teti angu 102, mbi ga ti hinga tâ nda ti fini. Mbi bâ fadeso, so mbeni ye nde ti hon salango kusala na Jéhovah, pendere Nzapa ti ndoye ayeke dä pëpe. Mbi ngbâ lakue na donzi, nga na seni. Mbi lingbi ti diko mbeti sân lunette, na mbi yeke na ngangu ti bungbi legeoko na sewa ti mbi.”
Na lango 5 ti novembre, ngu 2000, Kseniya awara batême. Lo tene: “Fadeso, mbi mû fini ti mbi na Jéhovah ti sala na lo na ndoye. Mbi yeke kangbi apériodique na atract tongana mbi yeke duti na ndo ti kungo bus so ayeke ndulu na da ti mbi. Fani mingi, afami ayeke ga ti sala vizite, na mbi yeke na ngia ti kangbi na ala tâ tënë na ndo Jéhovah.”
Na ngia Kseniya ayeke ku ngoi so ‘fade mitele ti lo ayeke ga nzoni ahon mitele ti molenge; na lo yeke kiri ti wara ngangu ti lâ ti pendere ti lo.’ (Job 33:25) Tongana mbeni zo ti ngu 100 abâ so ngu ti lo ahon mingi pëpe ti manda tâ nda ti fini na lege ti Bible, ti mo a yeke tongana nyen?