Atënë So Azo Ahunda

Dutingo mbilimbili-kue pëpe ti wali masia Marie asala lani ye ti sioni na ndo mengo ngo ti Jésus?

Na ndo tënë ti ‘dungo Jésus,’ tondo so a sû na gbe ti yingo atene: “Tongana Joseph ahunda ti kamata Marie mama ti Jésus, tongana lo de lo hinga lo pëpe, a bâ ngo na yâ ti lo, so Yingo Vulu [“yingo ti nzoni-kue,” NW] amû na lo.” (Matthieu 1:18) Biani, yingo ti nzoni-kue ti Nzapa asala lani mbeni kpengba kusala na yâ ngo so Marie amë.

Ye oko, ka ti Marie a yeke tongana nyen? Para so a yeke na yâ ti lo asala kamême mbeni kusala na yâ ngo so lo më? Na bingo bê na azendo so Nzapa asala na akotara ti Marie, so ti tene na Abraham, Isaac, Jacob, Juda, nga na Gbia David, a lingbi molenge ni so a yeke dü lo aduti mbeni tâ hale ti ala. (Genèse 22:18; 26:24; 28:10-14; 49:10; 2 Samuel 7:16) Na mbeni lege nde wa molenge so Marie ayeke dü alingbi ande ti duti tâ héritier ti azendo ti Nzapa so? A lingbi lo duti tâ molenge ti Marie.​—Luc 3:23-34.

Ange ti Jéhovah aga na wali masia Marie, na lo tene: “Zia mbito, Marie, teti mo wara grâce na lê ti Nzapa. Bâ, fade mo më ngo na mo dü Molenge-koli, na fade mo di iri ti Lo Jésus.” (Luc 1:30, 31) Ti tene mbeni wali amë ngo, a hunda ti tene mbeni para na yâ ti lo ato nda ti lë. A lingbi ti tene so Jéhovah Nzapa asala si mbeni para na yâ ti Marie ato nda ti lë, na lo sala tongaso na gbiango fini ti Molenge ti lo ngengele oko na ndo ti ayingo, ti ga na ni na ndo sese.​—aGalate 4:4.

Mbeni molenge, so mbeni wali so ayeke mbilimbili-kue pëpe amë ngo ti lo na lege so, alingbi ti duti mbilimbili-kue? Nga tele ti lo ti mitele alingbi ti duti na siokpari oko pëpe? Tongana nyen andia so andu tënë ti dungo zo ayeke sala kusala tongana a tingbi lengo ti ye so ayeke mbilimbili-kue na ti so ayeke mbilimbili-kue pëpe? Dabe mo so a sala kusala lani na yingo ti nzoni-kue ti gbian fini ti mbilimbili-kue ti Molenge ti Nzapa, na a sala si Marie amë ngo ni. Ye so alungula ye kue so ayeke mbilimbili-kue pëpe na yâ para so ayeke na yâ ti Marie; na lege so, lo sigigi na mbeni mara ti gène so ayeke lani mbilimbili-kue tâ na tongo nda ni.

Atâa ye ni ayeke lani tongana nyen, e lingbi ti hinga biani na bê so kusala so yingo ti nzoni-kue ti Nzapa asala na ngoi ni so amû lege si ye so Nzapa aleke ti sala atambela nzoni. Ange Gabriel atene na Marie: “Fade yingo ti nzoni-kue aga na ndo mo, na fade ngangu ti Lo Ti Nduzu Ahon Kue abata mo na gbe ti dê ti lo. Nga teti tene so fade ye so ayeke dü a di iri ni nzoni-kue, Molenge ti Nzapa.” (Luc 1:35, NW) Biani, mo bâ mo tene yingo ti nzoni-kue ti Nzapa aga mbeni gbagba ti batango ndo so a sala si ngangu oko pëpe so ayeke sioni wala so alingbi ti sala sioni abuba maïngo ti molenge ni a londo na ngoi so a më ngo ni.

A yeke polele so a yeke lani na tïtî Babâ ti lo ti yayu, me pëpe na tïtî mbeni koli nde, si Jésus awara fini ti lo ti zo so ayeke mbilimbili-kue. Jéhovah ‘aleke mbeni tele’ teti lo, na Jésus, ti londo na ngoi so a më ngo ti lo ti gue na ni, ‘ayeke lani na siokpari oko pëpe, na a kangbi lo na awasiokpari.’​—aHébreu 7:26; 10:5.

[Foto na lembeti 19]

“Fade mo më ngo na mo dü Molenge-koli”